18.02.2026 - 12:13

Магілёўскі баль «Вясна кружыцца ў слаўным вальсе!» пройдзе ў абласным цэнтры 14 сакавіка. Пра гэта расказалі ў Магілёўскім абласным метадычным цэнтры народнай творчасці і культурна-асветнай работы.

Тэматычнае мерапрыемства будзе арганізавана сумесна з клубам бальнага і гісторыка-бытавога танца «Рэнесанс+» пры падтрымцы ГА «Прафесійная танцавальная ліга». Вясновы баль будзе прысвечаны Міжнароднаму дню вальса.

У праграме - танцы розных народаў і эпох. Сярод іх вальсы, контрдансы, кадрылі, паланэз і кругавыя танцы. Акрамя гэтага, для ўдзельнікаў падрыхтуюць тэматычныя інтэрактыўныя пляцоўкі, разнастайныя бальныя гульні і майстар-класы. Каб у кожнага засталіся прыгожыя фатаграфіі, будуць аформлены маляўнічыя фотазоны.

Як адзначылі арганізатары, узяць удзел у балі змогуць усе ахвочыя ад 16 гадоў. Аднак неабходна выканаць дрэс-код мерапрыемства. Для дам - ​​бальныя ці вячэрнія сукенкі ў падлогу, вееры і пальчаткі. Кавалерам таксама неабходна выконваць класічны стыль у адзенні: белая кашуля, гальштук-матылёк, чорныя штаны і туфлі, белыя пальчаткі.

Баль адбудзецца 14 сакавіка ў 12.00 у фае ўстановы культуры па адрасе: Магілёў, пр-т Пушкінскі, 7. Рэгістрацыя ўдзельнікаў будзе праходзіць з 11.00 да 11.40.

Папярэдне зарэгістравацца і даведацца дадатковую інфармацыю пра мерапрыемствы можна па тэлефонах: 8 (0222) 78-08-04, 8 (0222) 76-50-18.

БЕЛТА

Теги