05.02.2026 - 16:50

Ва ўстанове культуры «Магілёўскі абласны метадычны цэнтр народнай творчасці і культурна-асветнай працы» адбылася значная падзея. Начальнік упраўлення культуры Магілёўскага аблвыканкама Аляксандр Жыгун прадставіў калектыву новага дырэктара.

Ім стала Юлія Сямёнава — вопытны кіраўнік, якая да гэтага часу паспяхова выконвала абавязкі дырэктара ДУК «Палац культуры вобласці».


Аляксандр Мікалаевіч у сваім звароце да калектыву адзначыў, што прызначэнне Юліі Уладзіміраўны азначае сабой новы этап у развіцці ўстановы, якая аб'ядноўвае цяпер напрамкі дзейнасці і кадры дзвюх значных устаноў культуры вобласці.

Нагадаем, што з канца снежня 2025 года была праведзена рэарганізацыя: да абласнога метадычнага цэнтру быў далучаны Палац культуры вобласці. Гэтае рашэнне накіраванае на ўмацаванне адзінай культурнай прасторы Магілёўшчыны, аптымізацыю рэсурсаў і стварэнне магутнай платформы для рэалізацыі маштабных праектаў.

- Юлія Уладзіміраўна зарэкамендавала сябе як ініцыятыўны, крэатыўны і адказны кіраўнік, здольны рэалізоўваць значныя культурныя праекты на самым высокім арганізацыйным узроўні, - падкрэсліў Аляксандр Жыгун. - Упэўнены, што пад яе кіраўніцтвам цэнтр працягне паспяхова рэалізоўваць значныя для культуры Магілёўскай вобласці задачы.

Прафесійны шлях Юліі Сямёнавай і яе поспехі гавораць самі за сябе. Яна прадэманстравала не толькі высокую кампетэнтнасць у адміністрацыйных пытаннях, але і глыбокае разуменне сучасных культурных працэсаў, уменне працаваць з творчымі калектывамі і выбудоўваць эфектыўную камунікацыю.

Наперадзе — вялікая сумесная работа па ўвасабленні ў жыццё новых ідэй, захаванні багатай культурнай спадчыны Прыдняпроўскага краю і стварэнні яркіх культурных мерапрыемстваў, якія стануць здабыткам кожнага жыхара Магілёўскай вобласці.

mogilevnews.by