26.01.2026 - 10:16

У Магілёўскім абласным драматычным тэатры 30 і 31 студзеня пакажуць прэм'еру спектакля «Трыбунал» паводле культавай п'есы класіка беларускай літаратуры Андрэя Макаёнка.


«Трыбунал» - гэта выбух эмоцый, апантаная энергія і глыбіня, ад якой сціскаецца сэрца.

Дзеянне разгортваецца ў 1942 годзе ў беларускай вёсцы, акупаванай нямецкімі войскамі. У адным з дамоў жыве сям'я пастуха Цярэшкі: яго малодшы сын Валодзька, нявестка Надзейка і Паліна - жонка Цярэшкі. Менавіта Паліна - галава сям'і. Парадак і спакой у доме трымаюцца на яе плячах. Яна прымае рашэнні ў найскладаных сітуацыях і не дае хаосу вайны пракрасціся ў іх жыццё. Паліна - генерал сям'і, і, здаецца, усё пад яе кантролем... Пакуль Цярэшка не прыносіць вестку аб тым, што яго прызначылі старастай і зараз ён будзе служыць нямецкаму кіраванню.


Над спектаклем працуе галоўны рэжысёр, рэжысёр-пастаноўшчык тэатра Каміля Хусаінава. «Я вырашыла дадаць у яго інсцэніроўку - хронікі вайны, якую прадставім як тэатральную метафару, якая падахвочвае публіку чытаць паміж радкоў. Змешванне гэтых двух жанраў - таксама эксперымент і новы досвед. А гэта заўжды цікава. І нам, і, спадзяюся, гледачу», - распавяла яна.


БЕЛТА