20.01.2026 - 16:58

У Год беларускай жанчыны філіял Магілёўскага абласнога краязнаўчага музея ім. А.Р. Раманава - Мастацкі музей імя В.К. Бялыніцкага-Бірулі ў г. Бялынічы аб'яўляе творчы жаночы марафон «Адзін народ - адзін абярэг» - «Рукаробны мікс-абярэг». Пра гэта паведамілі ва ўстанове культуры.


Музей запрашае прыняць удзел жанчын усіх узростаў з Рэспублікі Беларусь у стварэнні незвычайнага мастацкага аб'екта - жаночага рукадзельнага абярэга.

Задача простая і цікавая: стварыць арыгінальны квадрат памерам 30 х 30 см з дапамогай тэхнікі лапікавага шыцця або вязання кручком. Важна, каб праца была шчыльнай і трывалай. Не забыцца пазначыць сваё прозвішча, імя і горад на спецыяльнай налепцы-шаўроне памерам 8х4 см.

Тэматыка выяў - асабісты абярэг, абярэг або аўтэнтычны арнаментальны элемент мясцовасці пражывання.

Работы неабходна даслаць на адрас: 213051, Магілёўская вобласць, г.Бялынічы, вул. Савецкая, 13а. Затым усе творчыя квадраты будуць беражліва сабраны ў адзінае палатно - агульны абярэг, які сімвалізуе яднанне таленавітых жанчын Беларусі.

У канцы 2026 года музей падвядзе вынікі марафона спецыяльным выставачным праектам. Кожная ўдзельніца зможа ўбачыць сваю ўнікальную працу, якая стала часткай вялікага праекта.

Рэд.