Выстава-кірмаш «Народны каларыт» збярэ ў Магілёве майстроў з усёй Беларусі 13–16 красавіка

Міжнародны форум «Традыцыйная культура як стратэгічны рэсурс устойлівага развіцця грамадства» пройдзе з 13 па 16 красавіка ў Магілёве. У праграме мерапрыемства ўпершыню будзе арганізавана выстава–кірмаш «Народны каларыт».

У Магілёўскім абласным метадычным цэнтры народнай творчасці і культурна–асветнай працы расказалі, што ў аснове ўстойлівай будучыні нашага грамадства ляжыць захаванне традыцый:

– Выстава–кірмаш будзе працаваць 14–15 красавіка. Яна стане яркай падзеяй, якая аб'ядноўвае майстроў народных мастацкіх рамёстваў з усёй Беларусі. Галоўная мэта – паказаць багацце і разнастайнасць традыцыйных рамёстваў, а таксама прадставіць унікальныя вырабы, выкананыя рукамі таленавітых умельцаў.

На выставе будуць прадстаўлены тэматычныя пляцоўкі ўсіх абласцей і Мінска. Рэгіёны адлюструюць сваю самабытнасць і культурныя асаблівасці. Часткай экспазіцыі стануць майстар–класы па вырабе розных вырабаў, продаж сувенірнай прадукцыі, канцэртная праграма творчых калектываў.

Выстаўка размесціцца на вулічнай пляцоўцы каля цэнтра народнай творчасці па адрасе: праспект Пушкінскі, 7. У першы дзень яна будзе працаваць з 10.00 да 19.00, у другі — з 9.30 да 15.00.

СБ