Квэсты, касцюмаваныя экскурсіі, флэшмобы, майстар-класы, канцэрты пройдуць у Магілёўскай вобласці ў Ноч музеяў

Наведаць квэсты, касцюмаваныя экскурсіі, флэшмобы, майстар-класы, канцэрты, светлавое шоу і шоу мыльных бурбалак, інтэрактыўныя гульні і іншыя мерапрыемствы змогуць жыхары Магілёўскай вобласці 17-20 мая. У гэтыя дні ў рэгіёне традыцыйна пройдзе акцыя «Ноч музеяў», прымеркаваная да Міжнароднага дня музеяў, які будзе адзначацца 18 мая, паведамілі ва ўпраўленні культуры Магілёўскага аблвыканкама.

У маштабнай акцыі, асноўнай мэтай якой з’яўляецца паказ рэсурсаў, магчымасцей, патэнцыялу сучасных музеяў, прыме ўдзел больш за 20 музеяў рэгіёна.

Так, насычаная праграма чакае 17 мая наведвальнікаў Магілёўскага абласнога краязнаўчага музея імя Е. Р. Раманава. На кожным з трох паверхаў установы культуры будуць праводзіцца экскурсіі, міні-выставы, майстар-класы, віктарыны, працаваць інтэрактыўныя зоны, тэматычна адпаведныя размешчаным тут экспазіцыям: «Археалогія і старажытная гісторыя Магілёўшчыны», «Прырода краю», «Гісторыя краю з IX стагоддзя па 1917 год», «Гісторыя краю з 1917 па 1945 гг.» Усе, хто прыйдзе на свята, змогуць прыняць удзел у падрыхтоўцы і дэгустацыі старажытнага напою, археалагічным раскопе, майстар-класе па валенні воўны, вырабіць з паперы танк або самалёт, паназіраць за працай майстра на ганчарным крузе, захаваць сябе ў вобразах шляхціца і шляхцянкі XVII стагоддзя, прымерыць мундзір радавога Магілёўскага пяхотнага палка, прагуляцца з А. С. Пушкіным, паглядзець тэатральную пастаноўку і інш. Цана поўнага ўваходнага білета складзе Br6, ільготнага – Br3.

Магілёўскі музей этнаграфіі 17 мая будзе сустракаць наведвальнікаў прэзентацыяй ваеннага рыштунку і ўзбраення. Праграмай акцыі таксама запланаваны выступленні Народнага ансамбля народнай песні «Прыпеўка», экскурсія «Легенды і міфы аб Магілёве пры свечках з “жывымі скульптурамі”», спектакль-батлейка «Казка пра Насцечку». Тут будзе арганізаваны майстар-клас па арыгамі, вырабе прадметаў з пап’е-машэ, калажаў з каляровай паперы, квілінгу. Цана поўнага ўваходнага білета складзе Br6, ільготнага – Br3.

У магілёўскай ратушы ў гэты ж дзень для гасцей «Ночы музеяў» падрыхтавалі квэст «Арфей і Эўрыдзіка» і супер-гульню на прыз Магілёўскага гарвыканкама. Таксама запланаваны шэраг тэматычных мерапрыемстваў «Пад знакам муз»: «Астранамічны арт-ф’южн», лекцыя гісторыка Уладзіміра Зарэмскага, тэатральная праграма «Пародыя на Іліяду», канцэртна-танцавальная праграма, адкрыццё выставы карыкатур Яўгена Булавы, інтэрактыўная выстава аднаго дакумента. На працягу ўсяго вечара будзе працаваць арыгінальная фотазона, cinema-room, дзіцячы куток. Кожную гадзіну па музеі будуць праводзіцца касцюмаваныя экскурсіі. Таямніцы гарадскога гадзінніка на Ратушы раскрые іх стваральнік, гадзіншчык Генадзь Галоўчык.

Будзе дзейнічаць адзіны білет на ратушу і выставачную залу (дзе працуе выстава «Выяві сябе»), які ўключае свабодны ўваход на ўсе мерапрыемствы, экскурсійнае абслугоўванне, магчымасць наведвання вежы ратушы з выхадам на назіральную пляцоўку з панарамным біноклем і з уздымам да вежавага гадзінніка. Цана ўваходнага квітка на інтэрактыўную праграму: Br 5 – для дарослых, Br 2,5 – для дзяцей і студэнтаў, дзеці да 7 гадоў – бясплатна.

У Магілёўскім абласным мастацкім музеі імя П. В. Масленікава падрыхтавалі інтэрактыўную праграму «Нясумны музей». Наведвальнікаў чакаюць «жывыя партрэты», майстар-класы, віктарыны, конкурсы, дыяфільмы, квэст, аквагрым, «сакрэтны экспанат», акцыя «Белая кветка», фотазоны, конкурс «Найлепшае сэлфі», розыгрыш «Залатога квітка», прызы і інш. На наведванне сямі лакацый праграмы ў музеі прапануюць адзіны квіток: Br 4 – для дарослых, Br 2 – для дашкольнікаў і навучэнцаў, дзецям да 3-х гадоў – бясплатна.

У гэтым сезоне да традыцыйнай акцыі далучыцца і філіял Нацыянальнага мастацкага музея Беларусі музеі В. К. Бялыніцкага-Бірулі. 18 мая тут з 15.00 да 21.00 арганізатары плануюць здзівіць інтэрактыўным выставачным праектам «Хованкі». У дзень свята пройдуць варкшоп «Думаем пра будучыню горада», прэзентацыя моладзевага музычнага праекта «Пешаходка», флэшмоб «Запальваем ноч». Усе, хто жадае, змогуць паўдзельнічаць у майстар-класах па маляванні на вадзе, вулічнай фатаграфіі, вырабе сувеніраў і цацак-свістулек з керамікі, наведаць моднае дэфіле, светлавое шоу і шоу мыльных бурбалак, іншыя забавы. Цана ўваходнага квітка: Br 4 – для дарослых, 2 – для дзяцей, дзецям да 3 гадоў – бясплатна.

Бабруйскі краязнаўчы музей 17 мая прапануе жыхарам і гасцям горада прыняць удзел у вечары квэстаў «Лабірынты часу». Старт мерапрыемствам будзе дадзены ў 16.00 гульнёй «Куды вядуць сляды бабра» для дзяцей ад 10 гадоў, дзецям старэйшым у 18.00 прапануецца прайсці па больш складаным маршруце – «Дарогамі вызвалення», а самы звілісты лабірынт – «У пошуках рукапісу Вінцэнта» – чакае знатакоў музыкі і літаратуры ў 19.40. На працягу вечара будуць працаваць майстар-класы, фотазоны. Уваход платны.

Раённыя музеі Магілёўскай вобласці таксама прымуць актыўны ўдзел у міжнароднай акцыі.

Напрыклад, у Палацы Пацёмкіна ў Крычаве запланавана шоу хадулістаў і роставай лялькі. Інтэрактыўныя праграмы прапануюць дзецям і дарослым. Таксама наведвальнікам дадуць унікальную магчымасць прадэгуставаць чай у «Пацёмкінскай чаёўні», убачыць лялечны спектакль «Аднойчы майскім вечарам», пастаноўку «Папялушка», мастацкі фільм аб Вялікай Айчыннай вайне «Т-34», пабываць на пляцоўцы «Салдацкі прывал», патанцаваць, прыняць удзел у віктарынах, квэстах і інш. Завершыцца праграма маляўнічым фаер-шоу спектаклем і святочным феерверкам. 

У Горацкім гісторыка-этнаграфічным музеі 17 мая пройдзе літаратурна-музычны вечар «У музейнай памяці імгненні Перамогі». У праграме выстава ваенных рэліквій, канцэрт Народнага акадэмічнага хору «Спадчына», паказ мод і інш.

Быхаўскі раённы гісторыка-краязнаўчы музей сёлета запрашае на музычную музейную ноч «Музыка гісторыі...». Наведвальнікаў чакаюць выступленні салістаў і творчых калектываў дзіцячай школы мастацтваў горада Быхава, канцэрт узорнага духавога аркестра пад кіраўніцтвам В. К. Віннікава, майстар-класы па вырабе старажытных этнічных музычных інструментаў, а таксама розныя інтэрактывы, конкурсы, віктарыны. Уваход вольны.

Выставу «Абярэг для дома» 18 мая арганізуе Слаўгарадскі раённы гісторыка-краязнаўчы музей. Супрацоўнікі ўстановы культуры сумесна з рамеснікамі раёна больш падрабязна раскажуць пра гісторыю абярэгаў і правядуць майстар-класы па вырабе лялькі-берагіні.

«Кватэрнік» на Савецкай, 1 запланаваў на 17 мая Чавускі раённы гісторыка-краязнаўчы музей. Для тых, хто прыйдзе, з сольным канцэртам выступіць мясцовы ВІА «Рытм». Пачатак у 10.00. Уваход вольны.

Шклаўчанам 20 мая раённы гісторыка-краязнаўчы музей прапануе адправіцца ў падарожжа ў краіну Дыназаўрыю, паўдзельнічаць у майстар-класе «Карнавальная маска» і квэст-гульні «У пошуках скарбаў Кацярыны II». Цана квітка – Br 2.

«Музей у ХХІ стагоддзі – гэта не толькі месца сходу і захавання гістарычных і мастацкіх артэфактаў, але таксама сацыяльна-культурны інстытут са мноствам функцый, – адзначылі суразмоўцы. – Раскрыць патэнцыял сучаснага музея, паказаць яго шматгранныя рэсурсы і прыцягнуць маладую аўдыторыю – асноўныя задачы акцыі “Ноч музеяў”».