Магіляўчанка ў дзень паўналецця ўпершыню прагаласавала за будучыню краіны

Валерыя Жарыкава аддала свой голас у першы дзень датэрміновага галасавання на рэферэндуме па Канстытуцыі. Дзяўчыну віншавалі ўсёй камісіяй – менавіта 22 лютага ёй споўнілася 18 гадоў.

Навучэнка Магілёўскага дзяржаўнага тэхналагічнага каледжа Валерыя Жарыкава ў дзень свайго паўналецця прыйшла на ўчастак для галасавання. Нягледзячы на актыўную падрыхтоўку да святкавання дня нараджэння і бесперапынныя віншаванні, дзяўчына не змагла застацца ўбаку ад важнай для ўсіх беларусаў палітычнай падзеі – правядзення канстытуцыйнага рэферэндуму.

«Сёння ўпершыню ў жыцці ўдзельнічаю ў такой значнай падзеі для ўсёй краіны, як рэферэндум, – адзначыла будучы тэхнолаг харчовых вытворчасцей. – Вельмі чакала гэтага дня. Сёння мне споўнілася яшчэ 18 гадоў. Прыемна, што ад майго выбару залежыць будучыня краіны. Сёння для моладзі робіцца многае, і я гэта бачу. Дзяржава дае нам базавы трамплін, гарантыі і ўпэўненасць у заўтрашнім дні. Больш за тое, у нашай моладзі ёсць самае галоўнае: мірная і незалежная краіна з багатай культурнай і гістарычнай спадчынай. І ад нас залежыць усё, каб зрабіць яе яшчэ лепшай».

Участак для галасавання на рэферэндуме № 134, да якога належыць Валерыя Жарыкава, размешчаны ў фае першага паверха інтэрната Магілёўскага дзяржаўнага тэхналагічнага каледжа. Тут зарэгістравана амаль 1,95 тыс. чалавек, у тым ліку 135 тых, хто галасуе ўпершыню. З іх 122 – навучэнцы гэтай установы адукацыі. У якасці памятнага падарунка для тых, хто галасуе ўпершыню, участковая камісія падрыхтавала сувенірныя пернікі. Акрамя таго, кожнаму маладому чалавеку, які ўпершыню аддасць свой голас, будзе падпісана персанальная віншавальная паштоўка.

Усяго ў Магілёве налічваецца амаль 5,8 тыс. маладых людзей, якія галасуюць першым разам.

БЕЛТА