«Магілёў» і «Славуціч» атрымалі перамогі ў матчах Кубка Салея

Хакеісты «Магілёва» і смаленскага «Славуціча» атрымалі перамогі ў матчах серады на Кубку Руслана Салея 2025 года.

«Магілёў» на выездзе сустракаўся з аршанскім «Лакаматывам», які стартаваў на турніры з дзвюх перамог запар. «Чыгуначнікі» адкрылі лік ужо на шостай хвіліне, але далей у матчы закідвалі толькі хакеісты гасцявой каманды. У выніку 5:1 на карысць «ільвоў», якія набралі першыя ачкі ў бягучым розыгрышы. Дубль за «Магілёў» аформіў Ілля Шапіра.

Паралельна ў Наваполацку мясцовы «Хімік» пацярпеў паражэнне ад «Славуціча» з лікам 1:3, адзіную шайбу паўночнікі аформілі толькі за 45 секунд да фінальнай сірэны. Смаленскі клуб выйграў два матчы з трох у групе Б, нафтавікі пакуль не набралі ніводнага ачка.

БЕЛТА