Магілёўская дзіцячая паліклініка № 1 пераедзе ў новы будынак: яе плошчы павялічацца ў 5 разоў

Завяршаецца рэканструкцыя будынка былой Магілёўскай паліклінікі № 3 па вул. Язерская, 6 пад дзіцячую паліклініку. Першых пацыентаў тут плануецца прыняць ужо ў канцы красавіка, расказаў начальнік галоўнага ўпраўлення па ахове здароўя аблвыканкама Аляксандр Старавойтаў.

Пасля рэканструкцыі ў абноўлены будынак пераедзе дзіцячая паліклініка № 1 абласнога цэнтра, якая зараз функцыянуе ў прыстасаваным памяшканні жылога дома па праспекце Міра, 12. На новай базе медустанова працягне абслугоўваць дзіцячае насельніцтва цэнтральнай часткі горада, а таксама зможа ахапіць некалькі найбліжэйшых мікрараёнаў, якія зараз у зоне абслугоўвання паліклінікі № 12 (так званай Чыгуначнай). Будучы будынак дзіцячай паліклінікі адрозніваецца вельмі зручным размяшчэннем. Каля яго ёсць прыпынкі грамадскага транспарту, а таксама прылягае вялікая бясплатная паркоўка.

«Пасля таго як мы пабудавалі ў 2020 годзе новую паліклініку № 3 у мікрараёне Казіміраўка абласнога цэнтра, застаўся будынак на вул. Язерскай, які гістарычна быў медыцынскім, – адзначыў Аляксандр Старавойтаў. – У сувязі з гэтым ужо даўно прынятае рашэнне пераразмеркаваць паміж паліклінікамі частку дарослага і дзіцячага насельніцтва. Будынак па праспекце Міру ўжо не адпавядае сучасным патрабаванням у плане якаснага аказання медыцынскай дапамогі, у тым ліку праз адсутнасць неабходнай колькасці кабінетаў і абслугоўвання вялікай колькасці дзяцей. У абноўленай дзіцячай паліклініцы размесціцца ўсё неабходнае. Установа будзе поўнасцю прыведзена ў адпаведнасць з сучаснымі санітарнымі нормамі і правіламі, пачынаючы ад асобнага ўваходу, пад’ёмнікаў для калясак, устаноўкі новага рэнтген-апарата і заканчваючы кабінетамі для прыёму вузкіх спецыялістаў».

Паводле слоў галоўнага ўрача Магілёўскай дзіцячай паліклінікі № 1 Алесі Будзьковай, у параўнанні з існуючай плошча паліклінікі пасля пераезду павялічыцца ў 5 разоў. Гэта будуць 3 паверхі і 2 крылы. «Адным з найважнейшых момантаў па функцыянале ў новым памяшканні стане тое, што ў нас размяжуюцца патокі тэмпературных і нетэмпературных дзяцей, – адзначыла галоўурач. – Гэта неабходна не толькі ва ўмовах працы з COVID-інфекцыяй, калі ў нас з’явіліся чыстыя і брудныя зоны. Для дзяцей гэта актуальна заўсёды, таму што большая частка работы з імі – прафілактычная: вакцынацыя, дыспансерызацыя. У новым будынку ўсё гэта прадугледжана праектам».

Пасля наваселля ў паліклініцы з’явяцца 3 педыятрычныя аддзяленні: 2 з іх будуць уяўляць сабой участковую службу, адно ахопіць установы адукацыі. Акрамя таго, на базе паліклінікі пачне функцыянаваць аддзяленне рэабілітацыі, стэрылізацыйнае аддзяленне са стэрылізатарам праходнага тыпу. Шырокія медыцынскія магчымасці забяспечыць новае сучаснае абсталяванне: лічбавы рэнтген-апарат, 2 УГД-апараты высокага класа, біяхімічны і гематалагічны аналізатары, фізіяабсталяванне, а таксама абсталяванне для рэабілітацыі дзяцей пасля пераломаў, распрацоўкі суставаў верхніх і ніжніх канечнасцяў.

«Акрамя гэтага, у паліклініцы з’явяцца 2 сучасныя ўстаноўкі – працоўныя месцы афтальмолага і оталарынголага, – удакладніла Алеся Будзькова. – На сёння сярод амбулаторна-паліклінічных арганізацый такое абсталяванне ёсць толькі ў новай паліклініцы № 3 у Казіміраўцы. Сучасная камплектацыя ўстановы аховы здароўя, а таксама пашырэнне штату супрацоўнікаў дасць магчымасць больш інтэнсіўна развіваць на базе паліклінікі шэраг платных паслуг. Імі зможа скарыстацца любы гараджанін, а не толькі замацаваныя за ўстановай аховы здароўя пацыенты».

Асобная ўвага нададзена безбар’ернаму асяроддзю. У абноўленым будынку прадугледжана абсалютна ўсё, пачынаючы ад санвузлоў на кожным паверсе да пад’ёмнікаў на ўсходах і таблічак са шрыфтам Брайля на дзвярах. Акрамя таго, ва ўстанове па праекце выстаўлены 2 ліфты. Адзін з іх грузавы і можа змясціць інвалідную каляску любога памеру.

Паводле слоў Аляксандра Старавойтава, агульны кошт рэканструкцыі складае каля Br6,3 млн. Паліклініка будзе абслугоўваць па плане прыкладна 12,7 тыс. дзяцей. Медыцынскі персанал, асноўную масу якога складаюць педыятры і ўчастковыя, захаваецца і пяройдзе са старога будынка ў новы. Узбуйненне паліклінікі дасць магчымасць павысіць якасць аказання медыцынскіх паслуг.

БЕЛТА