Магілёўскі ЦАР заняў 6-е месца ў розыгрышы Кубка чэмпіёнаў па пляжным футболе

Магілёўскі ЦАР заняў шостае месца ў розыгрышы Кубка еўрапейскіх чэмпіёнаў па пляжным футболе, які завяршаецца ў партугальскім Назары.

Сёння ў паядынку за пятую выніковую пазіцыю каманда Вадзіма Бокача сустракалася з леташнім пераможцам КЧ ізраільскім клубам «Кфар Касем» і ўступіла з лікам 3:8. У складзе прайграўшых галы забілі Ягор Гардзецкі, Уладзімір Усціновіч і Юрый Пятроўскі.

На папярэднім этапе чэмпіёны Беларусі перамаглі італьянскі клуб «Катанія», ізраільскі «Рош Хайін» і партугальскі ГРАП, заняўшы першае месца ў групе Н. У матчы 1/8 фіналу магіляўчане разграмілі балгарскі «Спартак» з Варны з лікам 8:3, у чвэрцьфінале уступілі партугальскай «Брагу» - 5:7, а ўчора ў першым матчы турніру за 5-8-е месцы атрымалі валявую вікторыю над італьянскім «Напалі» - 4:3.

У вырашальным паядынку за галоўны прыз «Брага» сустрэнецца з італьянскай «Пізай», а партугальскі «Сотаа» і іспанскі «Рэкрэатыва» паспрачаюцца за бронзу.

Розыгрыш Кубка еўрапейскіх чэмпіёнаў па пляжным футболе праводзіцца з 2013 года. У мінулым сезоне яго выйграў «Кфар Касэм», які перамог у фінале «Пізу», бронзу заваяваў «Сотаа». Часцей за іншых пераможцам станавіўся «Крышталь» з Санкт-Пецярбурга, у якога чатыры трафеі.

БЕЛТА