Магілёўскія эксперты аднавілі фрагмент лістка часоў Вялікай Айчыннай вайны

Магілёўскія эксперты аднавілі фрагмент лістка часоў Вялікай Айчыннай вайны, знойдзенага пры раскопках на Буйніцкім полі. Пра гэта паведаміла галоўны спецыяліст па працы са СМІ упраўлення Дзяржаўнага камітэта судовых экспертыз па Магілёўскай вобласці Ірына Рачкоўская.

Са слоў суразмоўніцы, раскопкі на тэрыторыі Буйніцкага поля, дзе ішлі гераічныя абарончыя баі ў ліпені 1941-га, упершыню праведзеныя толькі цяпер – у чэрвені 2020 года, праз 79 гадоў. Адна са знаходак – фрагмент ліста паперы з вокладкай – паступіла на даследаванне экспертам упраўлення Дзяржаўнага камітэта судовых экспертыз па Магілёўскай вобласці. Аб’ект праляжаў у зямлі без малога восем дзясяткаў гадоў, быў моцна пакрыты напластаваннямі грунту і прасякнуты брудам. Патрабаваліся спецыяльныя веды, каб ачысціць яго, пры гэтым не пашкодзіўшы».

«Для выдалення грунту, прадуктаў гніення і надання эластычнасці паперы эксперты на працягу некалькіх сутак размочваюць яе ў розных хімічных растворах, у выніку чаго ўдалося аднавіць фрагмент тэксту, набранага друкарскім спосабам, – расказала суразмоўца. Зыходзячы са зместу тэксту, можна меркаваць, што менавіта гэту прапагандысцкую прамову слухалі байцы Чырвонай Арміі для ўзняцця баявога духу. На жаль, ніякіх запісаў, якія паказваюць на прыналежнасць даследаванай улёткі канкрэтнаму чалавеку, не ўстаноўлена».

Дарэчы, спецыялісты УГКСЭ па Магілёўскай вобласці не ўпершыню даследуюць рэчы вайскоўцаў часоў Вялікай Айчыннай вайны, выяўленыя пошукавікамі пры раскопках. Так, у 2019 годзе дзякуючы экспертным даследаванням удалося ідэнтыфікаваць астанкі двух загінулых – Сямёна Якаўлевіча Дрышчанкі, курсанта Мінскай школы міліцыі, які ўдзельнічаў у баях у складзе батальёна міліцыі пад кіраўніцтвам капітана Уладзімірава, і Андрэя Андрэевіча Музыкі, ураджэнца Палтаўскай вобласці Украіны.