RU BY EN 中文
Twitter Instagram

Магілёўскую абласную бальніцу медрэабілітацыі перапрафілююць пад працу з COVID-19

Магілёўскую абласную бальніцу медыцынскай рэабілітацыі перапрафілююць пад працу з COVID-19. Пра гэта паведаміў начальнік галоўнага ўпраўлення па ахове здароўя Магілёўскага аблвыканкама Аляксандр Старавойтаў.

Такое рашэнне прынята з-за павелічэння ў рэгіёне колькасці хворых на вострыя вірусныя і рэспіраторныя інфекцыі, у тым ліку на каранавірус. «На дадзены момант ідзе працэс змены сістэмы шпіталізацыі ў дадзенай ўстанове аховы здароўя. У абласной бальніцы рэабілітацыі рыхтуюць 150 месцаў для пацыентаў з каранавіруснай інфекцыяй. Таксама ў Магілёўскім абласным шпіталі інвалідаў Айчыннай вайны адно аддзяленне выдзелена пад рэабілітацыю пацыентаў, якія перанеслі пнеўманію, у тым ліку COVID-19. Усе астатнія ўстановы аховы здароўя працуюць у штатным рэжыме», – адзначыў Аляксандр Старавойтаў.

Як расказала галоўная медыцынская сястра Магілёўскай абласной бальніцы медыцынскай рэабілітацыі Вольга Дзядук, ва ўстанове аховы здароўя распрацаваны рэжым, які забяспечвае захаванне ўмоў інфекцыйнага стацыянара. «Распрацаваны і зацверджаны схемы руху персаналу і пацыентаў, якія выключаюць скрыжаванне патокаў. Для супрацоўнікаў бальніцы на 7 паверсе выдзелена чыстая зона з магчымасцю раздзялення персаналу розных аддзяленняў», – адзначыла Вольга Дзядук.

У бальніцы зацвердзілі варыянты выкарыстання ахоўнага адзення і СІА пры выкананні розных маніпуляцый. «Харчаванне пацыентаў арганізавана ў палатах з ужываннем аднаразовага посуду з мэтай выключэння распаўсюджвання каранавіруснай інфекцыі ў бальніцы. Распрацаваны таксама памяткі для пацыентаў па выкананні санітарна-супрацьэпідэмічнага рэжыму падчас знаходжання ў стацыянары на перыяд работы бальніцы ў новых умовах», – падкрэсліла галоўная медсястра.

Магілёўская абласная бальніца рэабілітацыі разлічана на 183 койкі. Зараз тут працуе 220 чалавек.

БЕЛТА

Пры выкарыстанні матэрыялаў актыўная гіперспасылка на mogilev-region.gov.by абавязковая