Мінпрацы расказала, хто атрымае матэрыяльную дапамогу да Дня Перамогі

Аднаразовую матэрыяльную дапамогу з рэспубліканскага бюджэту да Дня Перамогі атрымаюць каля 10 тыс. чалавек. Памеры матэрыяльнай дапамогі вызначаны пастановай урада нумар 180 ад 14 сакавіка 2023 года, паведамілі ў прэс-службе Міністэрства працы і сацыяльнай абароны.

Матэрыяльная дапамога да Дня Перамогі штогод выплачваецца ветэранам Вялікай Айчыннай вайны і асобам, якія пацярпелі ад наступстваў вайны, у адпаведнасці з рашэннем кіраўніка дзяржавы.

У гэтым годзе інвалідам і ўдзельнікам Вялікай Айчыннай вайны, асобам, якія прымалі ўдзел у баявых дзеяннях па абароне Айчыны да 3 верасня 1945 года, выплацяць па Br2 тыс. Такую ж суму атрымаюць тыя, хто прымаў удзел у складзе спецыяльных фарміраванняў у размініраванні тэрыторый і аб'ектаў пасля вызвалення ад нямецкай акупацыі ў 1943-1945 гадах.

Па Br1,1 тыс. выплацяць асобам, узнагароджаным ордэнамі або медалямі СССР за самаадданую працу і бездакорную воінскую службу ў тыле ў гады Вялікай Айчыннай вайны; асобам, якія працавалі на аб'ектах проціпаветранай абароны, мясцовай проціпаветранай абароны, на будаўніцтве абарончых збудаванняў, марскіх баз, аэрадромаў і іншых ваенных аб'ектаў у тылавых межах дзеючых франтоў, на прыфрантавых участках чыгунак і аўтамабільных дарог. Тое ж датычыцца тых, хто працаваў на прадпрыемствах, ва ўстановах і арганізацыях Ленінграда ў перыяд блакады з 8 верасня 1941 года па 27 студзеня 1944 года і ўзнагароджаны медалём «За абарону Ленінграда», і асоб, узнагароджаных знакам «Жыхару блакаднага Ленінграда».

Матэрыяльную дапамогу выплацяць і пацярпелым ад наступстваў вайны. Членам сем'яў ваеннаслужачых, партызан і падпольшчыкаў, загінулых (памерлых), прапаўшых без вестак у гады Вялікай Айчыннай вайны (мужу або жонцы, якія не заключылі новы шлюб, дзецям - інвалідам з дзяцінства (у тым ліку ўсыноўленым, удачароным), іншым утрыманцам, якім устаноўлена павышэнне пенсіі па названых падставах у адпаведнасці з заканадаўствам) належыць Br850. Такую ж суму выплацяць былым вязням фашысцкіх канцлагераў, турмаў, гета і іншых месцаў прымусовага ўтрымання, створаных фашыстамі і іх саюзнікамі ў гады Другой сусветнай вайны, якім устаноўлена павышэнне пенсіі па названай падставе ў адпаведнасці з заканадаўствам. Такая сума належыць і інвалідам з дзяцінства ў выніку ранення, кантузіі, калецтва, звязаных з баявымі дзеяннямі ў перыяд Вялікай Айчыннай вайны або з наступствамі ваенных дзеянняў.

У Мінпрацы і сацабароны падкрэслілі, што ў параўнанні з 2022 годам памер матэрыяльнай дапамогі павялічаны для ўсіх атрымальнікаў.

Матэрыяльную дапамогу будуць выплачваць з 26 красавіка па 4 мая. На выплату аднаразовай матэрыяльнай дапамогі з рэспубліканскага бюджэту будзе накіравана каля Br10 млн.

БЕЛТА