05.05.2026 - 17:30

Маштабнае абласное маладзёжнае інтэлектуальнае спаборніцтва – маладзёжны патрыятычны квіз «Код Перамогі» пройдзе ў Магілёве 7 мая. Пра гэта расказалі ў Магілёўскім абласным камітэце грамадскага аб'яднання «Беларускі рэспубліканскі саюз моладзі».

Паводле слоў арганізатараў, мерапрыемства прымеркавана да дзвюх знакавых дат: святкавання Дня Вялікай Перамогі і 85–годдзя гераічнай абароны Магілёва і збярэ каля 60 удзельнікаў.

«Квіз аб'яднае розныя пакаленні моладзі – ад школьнікаў і навучэнцаў каледжаў да прадстаўнікоў працуючай моладзі і маладых спецыялістаў, – падзяліліся суразмоўцы. – Знатакоў чакае сур'ёзная інтэлектуальная нагрузка. Ім трэба прайсці 8 тураў, у кожным з якіх па 7 пытанняў. Тэматыка заданняў ахопіць ключавыя падзеі Вялікай Айчыннай вайны, гісторыю абароны Магілёва ў 1941 годзе, а таксама факты аб пасляваенным аднаўленні краіны».

Па выніках напружанай барацьбы будуць вызначаны 3 каманды–пераможцы, якія пакажуць лепшы вынік і глыбокія веды гісторыі. Квіз накіраваны не толькі на праверку ведаў, але і на ўмацаванне сувязі паміж пакаленнямі і захаванне гістарычнай памяці і павагі да подзвігу савецкага народа.

Інтэлектуальнае спаборніцтва стартуе ў 16:00 на фут–корце АДЦ «Атрыум».

Рэд.