28.04.2026 - 09:39

У Музеі Славы Магілёўшчыны 28 красавіка адкрыецца выстаўка і пройдзе вочная абарона работ абласнога этапа рэспубліканскага конкурсу «Аб'екты Перамогі: гісторыя ў творчасці». Увазе журы будуць прадстаўлены макеты, аб'яднаныя тэмай Вялікай Айчыннай вайны. Пра гэта расказалі ў Магілёўскім абласным камітэце БРСМ.

У экспазіцыю ўвайшлі больш за 25 макетаў, створаных юнымі мадэлістамі, студэнтамі і педагогамі ўстаноў адукацыі рэгіёна. Удзельнікі аднавілі ў мініяцюры знакавыя інжынерныя збудаванні, баявую тэхніку, фрагменты лініі абароны і ключавыя аб'екты, звязаныя з гераічнымі падзеямі 1941–1945 гадоў.

Па выніках выставы журы адбярэ дзевяць найлепшых работ, якія прадставяць Магілёўскую вобласць у рэспубліканскім фінале. Макеты будуць ацэньваць па некалькіх крытэрыях, у тым ліку ўлічаць іх гістарычную дакладнасць, складанасць выканання, мастацкую каштоўнасць і арыгінальнасць задумы.

Як адзначылі ў маладзёжнай арганізацыі, конкурс накіраваны на захаванне гістарычнай памяці аб подзвігу савецкага народа, а таксама садзейнічае развіццю тэхнічнай творчасці і пошукавай работы сярод падрастаючага пакалення.

СБ