04.02.2026 - 13:02

Сёлета на ўдзел у традыцыйным гарадскім конкурсе была пададзена рэкордная колькасць праектаў — больш за паўсотні. З іх да фіналу дайшлі 22.


Сярод самых актыўных удзельнікаў - гімназісты, навучэнцы каледжаў, працаўнікі. Яны прапаноўвалі самыя розныя ідэі па развіццю інфраструктуры і турыстычнага патэнцыялу любімага горада: на конкурс былі прадстаўлены інфармацыйны гід-навігатар, інтэрактыўны - па вывучэнні Бабруйскай крэпасці, праект зоны адпачынку ля гарадскога пляжа, макет інклюзіўнай дзіцячай пляцоўкі, новая асоба дзіцячага парку, муралы з бабрам, ліхтары ў школьным двары, прысвечаныя вучэбным прадметам.


Як адзначыў старшыня Бабруйскага гарвыканкама Максім Гурын, маладыя землякі здолелі здзівіць смелымі ідэямі і крэатыўным падыходам да ператварэння гарадской прасторы.


Дыплома пераможцы ўдастоена інжынер садова-паркавай гаспадаркі КУП «Дарожна-эксплуатацыйнае прадпрыемства горада Бабруйска» Лізавета Бублей, якая распрацавала да Года беларускай жанчыны праект «Жаночыя рукі». Канцэпцыя: размясціць у розных частках горада скульптурныя кампазіцыі - далоні, - якія сімвалізуюць працавітасць, цеплыню, шматграннасць і душэўнасць беларусак.


Лепшая маладзёжная ініцыятыва ўвасобіцца ў жыццё пры падтрымцы Магілёўскай абласной асацыяцыі мясцовых Саветаў дэпутатаў і іншых крыніц.

СБ