На Магілёўшчыне распрацавалі новы турыстычны маршрут «У Быхаў да Сапегаў»

У Быхаве прэзентавалі новы турыстычны маршрут «У Быхаў да Сапегаў», які стартаваў на тэрыторыі Быхаўскага замка. Першымі наведвальнікамі сталі старшакласнікі сярэдняй школы №1, якія дзякуючы экскурсіі, распрацаванай і праведзенай навуковым супрацоўнікам раённага гісторыка-краязнаўчага музея Яўгеніяй Федарчук, змаглі перанесціся ў эпоху Сярэднявечча – тэатралізаваны паказ падрыхтавалі работнікі раённага Цэнтра культуры.

- Быхаў ва ўсе часы вылучаўся сярод іншых беларускіх гарадоў сваёй значнасцю ў ваенна-стратэгічных адносінах: гэтае месца служыла прыкладам горада-крэпасці. Замак быў пабудаваны з мэтай умацаваць гарадскую рысу, каб як мага даўжэй мець магчымасць стрымліваць націск ворагаў. А ідэя прайграць падзеі таго часу ўзнікла яшчэ ў пачатку года. Для рэалізацыі маршруту былі закуплены касцюмы, якія да драбнюткіх падрабязнасцяў адлюстроўваюць эпоху, калі Быхаўскі замак быў магутнай рэзідэнцыяй Сапегаў, - удакладніла загадчык метадычнага аддзела РЦК ДУК «Цэнтралізаваная клубная сістэма Быхаўскага раёна» Святлана Саламевіч.

Быхаўчане вераць: новы турыстычны маршрут па праве можа прэтэндаваць на званне брэндавага і будзе карыстацца папулярнасцю, бо замак Хадкевічаў і Сапег уяўляе сабой найзырчэйшы помнік архітэктуры XVI–XVII стагоддзяў.

СБ