Рус Бел Eng 中文

Навагодні кадэцкі баль пройдзе ў Магілёве 20 снежня

Навагодні кадэцкі баль пройдзе 20 снежня ў Магілёве. Мерапрыемства стане часткай праграмы рэспубліканскай дабрачыннай акцыі «Нашы дзеці», аб чым паведаміла намеснік дырэктара па выхаваўчай рабоце Магілёўскага абласнога кадэцкага вучылішча Марыя Уласенка.

«Кадэцкі баль будзе арганізаваны 11-м разам і адбудзецца ў магілёўскім Палацы грамадзянскіх абрадаў, – адзначыла Марыя Уласенка. – Яго ўдзельнікамі стануць выхаванцы кадэцкага вучылішча, а таксама выканаўцы студыі эстраднага танца «Эдэльвейс» цэнтра творчасці «Эверэст». У свяце будзе задзейнічана больш за 60 кадэтаў, у тым ліку 10 чалавек – у складзе танцавальных пар».

Традыцыю правядзення кадэцкіх баляў можна па праве лічыць одай маладосці і данінай павагі да найлепшых афіцэрскіх традыцый, упэўненая Марыя Уласенка. Паводле яе слоў, выхаванцы вучылішча вельмі цёпла і адказна ставяцца да гэтага мерапрыемства. Яно дае магчымасць кадэту праявіць сябе як асобу і паказаць свае найлепшыя якасці: галантнасць, мужнасць, узаемадапамогу, гонар і годнасць. Акрамя таго, такія балі фарміруюць культуру паводзін, вучаць курсантаў паважліва ставіцца да супрацьлеглага полу. Немалаважны і патрыятычны складнік мерапрыемства.

На балі пары будуць спяваць, танцаваць, удзельнічаць у імправізаваных гульнях і забавах. Кадэты таксама прадэманструюць страявыя прыёмы, ваенную выпраўку і навыкі абыходжання са зброяй, пакажуць сябе з творчага боку: выступяць у складзе кадэцкага вакальна-інструментальнага ансамбля і прадэкламуюць вершы падчас літаратурнай гасцінай. Завершыць баль вакальна-харэаграфічны нумар, прысвечаны Году народнага адзінства.

Ганаровымі гасцямі ўрачыстасці стануць прадстаўнікі выканаўчай улады і грамадскіх арганізацый рэгіёна, Міністэрства спорту і турызму, кіраўнікі сілавых структур і ведамстваў. Традыцыйна запрошаныя рыхтуюць навучэнцам кадэцкага вучылішча прыемныя навагоднія сюрпрызы і падарункі.

Як адзначыла Марыя Уласенка, у Магілёўскай вобласці, як і ва ўсёй дзяржаве, развіццю кадэцкага руху надаецца асаблівая ўвага, бо гэтыя маладыя людзі плануюць звязаць сваё жыццё з працай у сілавых структурах і ведамствах, стаяць на варце правапарадку і спакою грамадзян. У гэтым навучальным годзе выпускніком абласнога кадэцкага вучылішча стане 41 чалавек. Навучанне ў сценах установы праходзіць 167 падлеткаў.

БЕЛТА

Пры выкарыстанні матэрыялаў актыўная гіперспасылка на mogilev-region.gov.by абавязковая