04.02.2026 - 18:20

Пра сітуацыю ў аграпрамысловым комплексе рэгіёну распавёў старшыня Магілёўскага аблвыканкама Анатоль Ісачанка. Сёння ён паразмаўляў з журналістамі пасля тэлефоннага дакладу Прэзідэнту Беларусі Аляксандру Лукашэнку.

Анатоль Ісаанка расказаў, што гаспадаркі рэгіёну ў поўным аб'ёме забяспечаны травяністымі кармамі, камбікормам. Створана трывалая кармавая база, якая з'яўляецца падмуркам жывёлагадоўлі. Асобна ён адзначыў зладжаную работу ўсяго ланцуга паставак, уключаючы супрацоўніцтва з ЗАТ «БНБК» па забеспячэнню камбікормам для маладняку. Як расказаў кіраўнік рэгіёну, вытворчыя магутнасці задзейнічаны максімальна: «Нашы вытворчыя магутнасці загружаны на 100%, нават крыху больш, праца арганізавана ў некалькі змен. Што тычыцца вытворчых участкаў, якія знаходзяцца ў сельгаспрадпрыемствах, яны таксама загружаныя пад поўную магутнасць».

Падчас размовы з журналістамі была закранутая тэма павелічэння падзяжу БРЖ ў студзені на 30%. Губернатар даў адназначную ацэнку прычынам. «Гэта не звязана з марозам, з чымсьці іншым, гэта проста элементарнае незахаванне тэхналогій і безгаспадарлівасць», - растлумачыў ён, дадаўшы, што ўсе неабходныя меры па павелічэнню рацыёнаў і пераводу жывёл у памяшканні ў маразы былі прыняты.

Адначасова Анатоль Ісачанка падрабязна спыніўся на комплексе неадкладных дзеянняў, накіраваных на выпраўленне сітуацыі. «Для таго, каб гэта ліквідаваць, створаны тры мабільныя групы спецыялістаў, якія працуюць непасрэдна на месцах, выязджаючы ў гаспадаркі і аказваючы розную дапамогу. Пачынаючы ад захавання тэхналогій, калі тут ёсць нейкія праблемныя моманты, і заканчваючы сітуацыямі, калі трэба вырашыць пытанне па павелічэнні камбікорму або дабаўленні іншых нейкіх рэсурсаў. Акрамя таго, у гаспадарках арганізавана дзяжурства па начах. Гэта значыць, задзейнічаны ўвесь магчымы рэсурс».

Паводле яго слоў, праца вядзецца кропкава ва ўсіх раёнах, з фокусам на тры рэгіёны, якія паказалі найбольшы рост паказчыка, - Шклоўскі, Глускі і Бабруйскі: «Таму мы зараз шчыльна працуем з гэтымі раёнамі, выязджаем на месца, глядзім у чым праблематыка і вырашаем пытанні, пачынаючы ад вакцынацыі, кармлення. Гэта не нешта адно, а комплекс праблем, якія трэба вырашаць», - адзначыў губернатар.

Значную частку дыялогу заняло абмеркаванне планамернай мадэрнізацыі галіны, якая ідзе ў рамках зацверджанай стратэгіі развіцця АПК. «Яна прынята на ўзроўні вобласці. У нас распрацавана праграма пабудаваць за пяцігодку 83 аб'екты», - паведаміў Анатоль Ісачанка, удакладніўшы, што гаворка ідзе аб будаўніцтве 20 і рэканструкцыі 63 ферм, у тым ліку - для пераводу жывёлы на сучаснае беспрывязнае утрыманне. Ён прывёў канкрэтныя мэты на бягучы год: 11 новых малочнатаварных комплексаў і 43 прафілакторыя для цялят. «Усё неабходнае ёсць, прынята пастанова ўрада, адпрацавана і ўжо ўсе кіраўнікі ведаюць месцы, дзе будуць будаваць», - запэўніў губернатар.

Асобна ён асвятліў ход рэалізацыі буйных інфраструктурных праектаў, дадзеных даручэннямі кіраўніка дзяржавы. Сярод якіх - будаўніцтва камбікормавага і малочнага заводаў у Шклове, апошні з якіх запланаваны да здачы ў гэтым годзе. Аднаўленне міжраённай базы захоўвання мінеральных угнаенняў на 25 тысяч тон. Стварэнне на яе базе ўласнага атрада для хімізацыі палёў. «Мы ўжо тэхніку закупілі, сёння яна ёсць. Таму мы рухаемся да таго, каб такія базы працавалі не на адзін раён, а на некалькі найбліжэйшых раёнаў. Таму што гэта вялікія грошы, вялікія аб'ёмы, вядома, яны павінныя быць задзейнічаныя», - адзначыў губернатар.

Гаворачы аб перапрацоўчай прамысловасці, Анатоль Ісачанка канстатаваў станоўчую дынаміку. «Тут сітуацыя ў нас выраўнялася, палепшылася. Сёння яны загружаныя практычна на 90% па мясе», - сказаў ён. Паводле слоў губернатара, гэта забяспечвае збыт для ўсёй прадукцыі жывёлагадоўлі вобласці праз дзяржаўныя прадпрыемствы, спажывецкую кааперацыю і перапрацоўчыя прадпрыемствы саміх гаспадарак, дзе яны сертыфікаваны, вырабляюць і прадаюць прадукцыю.

Падводзячы вынікі, Анатоль Ісачанка акцэнтаваў увагу на чалавечым фактары. «Гаворачы аб зімоўцы. Там, дзе ёсць гаспадар, там, дзе ёсць арганізацыя працы, там праблем няма», - сказаў ён. Па словах кіраўніка рэгіёну, у вобласці ёсць гаспадаркі без склону, са стабільным ростам вытворчасці, што даказвае вырашальную ролю дысцыпліны і захавання тэхналогій.

Юлія Таранава, фота Галіны Гаўрыловіч