13.05.2026 - 19:51

Намеснік старшыні Магілёўскага аблвыканкама Алена Пруднікава–Кірпічонак правяла сёння працоўныя сустрэчы з прадстаўнікамі Рэспублікі Замбія і Рэспублікі Ангола. Бакі абмеркавалі магчымасці актывізацыі двухбаковых гандлёва–эканамічных сувязей, а таксама перспектывы ўзаемадзеяння ў сферах прамысловасці, сельскай гаспадаркі, падрыхтоўкі кадраў і гарантавання харчовай бяспекі.


Вітаючы гасцей, Алена Пруднікава–Кірпічонак адзначыла, што па выніках 2025 года экспарт у краіны Афрыкі павялічыўся больш як у два разы. Далей яна расказала аб эканамічным і турыстычным патэнцыяле рэгіёну, падкрэсліўшы, што Магілёўская вобласць гістарычна з'яўляецца прамысловым рэгіёнам Беларусі з магутным экспартным патэнцыялам. Намеснік старшыні аблвыканкама пазначыла, што нароўні з паспяховым развіццём даўно існуючых прадпрыемстваў ствараюцца новыя галіны. Паінфармаваўшы, што ўсе беларускія шыны і ліфты вырабляюцца ў Магілёўскай вобласці, тут жа размешчаны два з трох айчынных цэментных заводаў. Акрамя таго, вобласць спецыялізуецца на выпуску сельскагаспадарчай тэхнікі, хімічнай прадукцыі, тканак, вырабаў з дрэва і прадуктаў харчавання.

Асобна Алена Пруднікава–Кірпічонак звярнула ўвагу на актыўнае развіццё аграпрамысловага комплексу рэгіёну. Было адзначана, што эканоміка рэгіёну арыентавана на экспарт: геаграфія знешнеэканамічнай дзейнасці Магілёўскай вобласці ахоплівае больш за 100 дзяржаў. Да гэтага часу гандлёва–эканамічныя адносіны ў Магілёўскай вобласці з Рэспублікай Замбія і Рэспублікай Ангола не вяліся, аднак, як падкрэсліла намеснік старшыні аблвыканкама, у рэгіёна ёсць паспяховы вопыт узаемадзеяння з суседнімі краінамі – Зімбабвэ і Дэмакратычнай Рэспублікай Конга, куды ў мінулым годзе было пастаўлена сельскагаспадарчай тэхнікі на $2 млн. Таксама абмяркоўвалася магчымасць прыёму студэнтаў з афрыканскіх краін у магілёўскіх ВНУ.


«Вельмі прыемна, што і Рэспубліка Замбія, і Рэспубліка Ангола адчыняюць для сябе Беларусь і Магілёўшчыну, у прыватнасці. І, як гаворыцца ў прыказцы, сустракаюць па адзенні, праводзяць па розуме, гэта значыць, па справах. Таму наша агульная задача зараз як паказаць свой патэнцыял, так і намеціць трэкі далейшых рухаў і развіцця нашых двухбаковых адносін. Гэта ключавая задача такіх міжнародных форумаў, як «Млын поспеху». Слухаючы водгук нашых гасцей, іх уражанні аб нашым рэгіёне, тое, што ім цікава, я ўпэўнена, што перспектывы ўзаемнага супрацоўніцтва ў нас вялізныя, толькі трэба іх не ўпусціць і развіваць», – адзначыла яна, адказваючы пасля заканчэння сустрэч на пытанні журналістаў.


У сваю чаргу Надзвычайны і Паўнамоцны Пасол Рэспублікі Замбія ў Расійскай Федэрацыі Абдон Лістон Маверэ і першы сакратар па палітычных і адміністрацыйных пытаннях Пасольства Рэспублікі Замбія ў Расійскай Федэрацыі Алан Мвіімбу падзякавалі кіраўніцтву рэгіёну за цёплы прыём і выказалі намер на развіццё супрацоўніцтва.

Так, Абдон Лістон Маверэ адзначыў, што з самага пачатку візіту ён знаходзіцца пад прыемным уражаннем: «Горад вельмі прыгожы, людзі вельмі ветлівыя. Мы ўжо паспелі атрымаць асалоду ад відамі горада, яго славутасцямі. Наведаць некаторыя прадпрыемствы. Так, мы пабывалі на ААТ «Магілёўскі мясакамбінат», які вельмі высока механізаваны і добра аснашчаны. Мы ўбачылі прадукцыю, якасцю якой можна ганарыцца.


Гістарычная каштоўнасць гэтага горада выклікае ў нас пачуццё павагі. І дае нам зразумець, што нашыя народы блізкія. І нам важна, што мы сёння тут і можам умацоўваць нашыя адносіны. Мы зробім усё, што залежыць ад нас, каб развіваць важныя сферы нашага супрацоўніцтва, наладзіўшы ўзаемадзеянне ў сферы сельскай гаспадаркі і вытворчасці. І гэта можа быць перадумовай для моцнага сяброўства. Нашая задача – актывізаваць ідэі, якія мы абмеркавалі на сустрэчы і падумаць, чаго мы можам дасягнуць разам».


Яшчэ адна сустрэча адбылася ў гэты дзень з саветнікам Пасольства Рэспублікі Ангола ў Расійскай Федэрацыі Анжэлу ду Розарыу Рафаэлем. Ён таксама выказаў зацікаўленасць у супрацоўніцтве: «Я бачу вялікія магчымасці ў тым, каб наладзіць адносіны паміж Беларуссю і Анголай. Сёння мы ўжо наведалі некалькі прадпрыемстваў Магілёва і ўбачылі шмат цікавых напрамкаў супрацоўніцтва, якія можна развіваць у далейшым. Убачыўшы ўсё гэта на свае вочы, я лічу, што ў нас вельмі вялікі патэнцыял. Аднак трэба шмат працы, каб усё гэта атрымала практычную напоўненасць». Ён падзякаваў за сустрэчу і магчымасць наведаць прадпрыемствы, прапанаваўшы ў будучым арганізаваць зносіны паміж прадпрыемствамі дзвюх краін з мэтай устанавіць узаемавыгаднае партнёрства. «Таксама мы хочам больш падрабязна вывучыць, што ў Беларусі робіцца для развіцця аграпрамысловага комплексу, як краіна рыхтуе спецыялістаў, падзяліцца вопытам», – адзначыў ён.

Перагаворы з дэлегацыямі адбыліся ў рамках XVI Міжнароднага эканамічнага форуму «Млын поспеху», які праходзіць у Магілёве 13–15 мая. Бакі адзначылі, што такія сустрэчы – гэта практычны крок у наданні рэальнай дынамікі гандлёва–эканамічным адносінам паміж краінамі.

Юлія Таранава, фота Галіны Гаўрыловіч