31.03.2026 - 09:18

Складаемыя эфектыўнасці

У Магілёўскай вобласці раннімі яравымі культурамі трэба будзе засеяць больш як 110 тысяч гектараў. За мінулыя выхадныя пасяўную пачалі ўсе раёны – на раніцу 30 сакавіка раннімі яравымі збожжавымі ў вобласці засеяна 14,3 тысячы гектараў. У Магілёўскім раёне ў ліку першых сяўбу пачало даччынае сельгаспрадпрыемства «Авангард».


Дзяніс Якімовіч – механізатар вопытны, толькі такім і давяраюць сяўбу, бо ад якасці працы напрамую залежыць будучы ўраджай, а пасяўныя комплексы – гэта дарагая і складаная ў кіраванні тэхніка:

— Мы ўжо пару разоў спрабавалі «прамацаць» палі, але тэхніка вязла из–за празмернасці вільгаці. І вось нарэшце ўсё склалася. Разам з аграномам выстаўляем налады нормы высеву і глыбіні заладкі – гэта важна для атрымання дружных ўсходаў і максімальнай ураджайнасці.

Дзяніс Якімовіч прыехаў у «Авангард» пасля шматгадовай працы ў горадзе кіроўцам, тут яму далі хату, даверылі энерганасычаную тэхніку.

– Пацягнула да працы на зямлі, я ж сам вясковы, з дзяцінства тату на трактары дапамагаў. Гэтае поле потым буду сам на камбайне прыбіраць, так што тут літаральна: што пасееш — тое пажнеш. Сакрэтаў шмат: дакладнае выкананне глыбіні заладкі насення, прамалінейнасць радкоў. Сеялка з перадпасяўной апрацоўкай глебы добрая тым, што за адзін праход выконвае рыхленне глебы, выраўноўванне, пасеў і прыкачванне.


Кіруе працэсам, як і ўсімі механізатарамі на пасяўной, галоўны аграном Наталля Ермалюгіна – ураджай–2026 будзе яе першым у гэтай пасадзе:

– Гэта момант ісціны. Як кожны на сваім месцы выканае тэхналогіі, наколькі якасна падрыхтавана тэхніка і насенне – вось складнікі эфектыўнасці. Мой муж – загадчык мехмайстэрні. Калі трэба камусьці пасядзець з дзіцём на бальнічным, то на сямейнай радзе вырашаем на карысць вытворчай неабходнасці: чыя праца ў дадзены момант незаменная.

Тэхнікі ў гаспадарцы дастаткова – былі б людзі, разважае галоўны аграном. Выпускніца БДСГА Наталля Ермалюгіна родам з суседняй вёскі Свяцілавічы. Пераканана, што ў замацаванні кадраў у вёсцы стаўку трэба рабіць менавіта на мясцовых жыхароў:

– Прэзідэнт заўсёды падкрэслівае, што для працвітання краіны важна захаваць вёску: не будзе вёскі – не будзе дзяржавы. У нас абнаўляецца тэхніка, пабудаваны новы малочнатаварны комплекс, цэх па вытворчасці сухіх кармоў, развіваем свінагадоўлю. У мінулым годзе сабралі багаты ўраджай: валавы намалот вырас на трэць. У наш дзіцячы садок нават з горада дзяцей прывозяць. Гэта значыць патрэбны інвестыцыі і канкрэтныя справы, каб чалавек разумеў: жыць у сельскай мясцовасці добра, выгадна і перспектыўна.


У «Авангардзе» планы на гэтую пасяўную маштабныя: 550 гектараў яравых плюс 100 – кукурузы на зерне, а яшчэ звыш тысячы гектараў на сілас, цукровыя буракі і іншыя культуры. Не паспееш азірнуцца, як пачнецца корманарыхтоўка. Стаўка – на пісьменнае планаванне структуры пасяўных плошчаў: у прыярытэце – азімыя збожжавыя, якія даюць вялікую ўраджайнасць.

У ТЭМУ

Сёлета ўсе збожжавыя культуры ў Магілёўскай вобласці будуць высеяны насеннем не ніжэй за першую рэпрадукцыю. Элітгасам аказваецца падтрымка, патанняецца частка затрат на элітнае насенне з рэспубліканскага бюджэту. Па структуры пасяўных плошчаў у рэгіёне пашырылі плошчу сяўбы кукурузы на зерне да 43 тысяч гектараў – у мінулым сезоне яна складала каля 30 тысяч гектараў, да 4 тысяч гектараў павялічылася плошча сяўбы соі. Гаспадаркі сеюць шматгадовую траву, уносяць калійныя і фосфарныя ўгнаенні пад яравую сяўбу, вядуць падкорм азімых. Перад аграрыямі стаіць задача не проста атрымаць высокі валавы збор збожжа, а забяспечыць высокую рэнтабельнасць праз строгае выкананне тэхналогій і пісьменную эканоміку.


 СБ