28.07.2026 - 12:37

Апошнія чатыры месяцы ў Магілёўскай вобласці назіраецца невялікі, але стабільны дадатак валавога рэгіянальнага прадукту. Аб гэтым расказаў кіраўнік Адміністрацыі Прэзідэнта Дзмітрый Крутой падчас рабочай паездкі ў рэгіён.

На базе ААТ «Белшына» адбылася нарада па пытанню вынікаў работы асобных арганізацый прамысловага комплексу Магілёўскай вобласці за студзень – чэрвень 2026 года.

Паводле слоў Дзмітрыя Крутога, было прынята рашэнне адысці ад фармату вялікай нарады са шматлікімі ўдзельнікамі і стандартнымі дакладамі, паколькі ўся статыстыка, аналітыка і галіновая раскладка па прадпрыемствах ужо ёсць. «Наша галоўная задача цяпер – разабрацца менавіта з болевымі кропкамі, якія перашкаджаюць рэгіёну выконваць даведзеныя прагнозныя паказчыкі. Ключавы з гэтых паказчыкаў – валавы рэгіянальны прадукт (ВРП). У якасці пазітыўнага моманту можна адзначыць, што ён выйшаў на ўзровень 100 працэнтаў, – падкрэсліў ён. – Станоўча і тое, што на працягу апошніх чатырох месяцаў мы назіраем невялікі, але стабільны дадатак. Гэта значыць, мы не прасядаем».


Як адзначыў Дзмітрый Крутой, тэмп росту прамысловай вытворчасці ў вобласці склаў 95,5 працэнта. «Карціна тут неадназначная і даволі пярэстая. У выбарцы знаходзіцца каля 200 прадпрыемстваў з рознай удзельнай вагой і ўплывам. Але ключавыя прадпрыемствы рэспубліканскай формы ўласнасці займаюць у прамысловым блоку Магілёўскай вобласці 45–47 працэнтаў, а тэмп росту яны даюць на сённяшні дзень усяго 90 працэнтаў. Таму асноўны ўпор на сённяшнім пасяджэнні мы зрабілі менавіта на іх», – сказаў кіраўнік Адміністрацыі Прэзідэнта.


Па выніках першага квартала былі дадзены пэўныя запэўненні і распрацаваны праграмы аднаўлення, падкрэсліў Дзмітрый Крутой. «Прэм'ер–міністр, якому Прэзідэнт даручыў асабіста курыраваць праблематыку прамысловага комплексу, правёў сур'ёзную работу з многімі прадпрыемствамі, – заявіў Дзмітрый Крутой. – Там, дзе ён падключыўся, ужо назіраецца станоўчая дынаміка. Мы сёння яшчэ раз уважліва паглядзелі на планы, якія былі распрацаваны па выніках першага квартала».

Ужо некалькі разоў, у тым ліку пры разборы сітуацыі ў ААТ «Белшына», Прэзідэнт адзначаў, што абмяркоўваў з Прэзідэнтам РФ Уладзімірам Пуціным сітуацыю на рынку аўтамабільных шын (як легкавых, так і грузавых). «Цяпер у Саюзнай дзяржаве і Еўразійскім эканамічным саюзе будзе прымацца шэраг наднацыянальных рашэнняў, каб стрымаць дэмпінгавую экспансію, якая абрушвае рынак і сур'ёзна ўплывае як на беларускія, так і расійскія шынныя кампаніі», – дадаў ён.


Паводле слоў Дзмітрыя Крутога, кіраўнік дзяржавы таксама падкрэсліў: калі ў прадпрыемстваў будуць добрыя, доўгатэрміновыя і эфектыўныя экспартныя кантракты, у Беларусі ёсць фінансавыя магчымасці іх пракрэдытаваць і прафінансаваць паводле экспартных схем. Ключавы момант тут – вяртанне знешняй дэбіторскай запазычанасці, звярнуў увагу кіраўнік Адміністрацыі Прэзідэнта.

Што датычыцца інвестыцыйных праектаў, якімі займаецца Магілёўская вобласць, яны ідуць поўнасцю ў графіцы. «Учора ў Клімавіцкім раёне мы глядзелі праграму будаўніцтва малочнатаварных комплексаў і прафілакторыя. Яна выконваецца з апярэджаннем. Ужо зараз, дзякуй ураду, частка рэсурсаў у рамках гадавых лімітаў, абазначаных на гэтую праграму, перакідваецца з іншых рэгіёнаў, дзе назіраюцца больш марудныя тэмпы. Акрамя таго, праектныя арганізацыі Магілёўскай вобласці атрымалі заданне ствараць новыя праектныя задзелы, якія мы зможам аператыўна прафінансаваць на наступным этапе, каб не спыняць гэту праграму», – сказаў ён.


Пры гэтым астатнія галіны эканомікі Магілёўскай вобласці працуюць устойліва, у станоўчай зоне. Нідзе няма крытычнага прасядання, адзначыў Дзмітрый Крутой. Будаўнічы комплекс, напрыклад, паказвае выдатныя вынікі, тэмпы інвестыцый у рэгіёне склалі 113 працэнтаў, што выводзіць на лідзіруючыя пазіцыі ў рэспубліцы. Ён дадаў, што стабільна і добра працуюць транспартны комплекс, сфера гандлю, грамадскага харчавання і энергетыка.

БЕЛТА