Навучанне прафактыва - інвестыцыя ў будучыню арганізацыі аховы здароўя

У Магілёўскай клінічнай бальніцы хуткай медыцынскай дапамогі прайшоў навучальны семінар для прафгрупаргаў і грамадскіх інспектараў па ахове працы.

Падчас семінара старшыня першаснай прафсаюзнай арганізацыі бальніцы Таццяна Бяляцкая падкрэсліла, што навучанне прафсаюзнага актыву - гэта інвестыцыя ў будучыню арганізацыі, паколькі кваліфікаваны і падрыхтаваны актыў здольны эфектыўна абараняць правы работнікаў, забяспечваючы іх інтарэсы і ствараючы бяспечныя ўмовы працы.

– Правядзенне семінараў для прафгрупаргаў і грамадскіх інспектараў па ахове працы ў бальніцах – гэта важны крок да стварэння спрыяльнага працоўнага асяроддзя для медыцынскіх работнікаў. Веды, атрыманыя на такіх мерапрыемствах, дапамагаюць удзельнікам не толькі абараніць правы і здароўе супрацоўнікаў, але і падвышаюць агульную эфектыўнасць працы медыцынскай установы, - звярнула ўвагу Таццяна Бяляцкая.

У час семінара быў разгледжаны шэраг пытанняў: арганізацыя работы з моладдзю ў МКБ ХМД; адміністрацыйная адказнасць за парушэнні нарматыўных прававых актаў па ахове працы; выкананне заканадаўства аб ахове працы ў структурных падраздзяленнях. Асобную ўвагу надалі спартыўна-масавым і турыстычным мерапрыемствам, якія запланаваны для работнікаў установы на бягучы год, а таксама пытанню санаторна-курортнага лячэння членаў прафсаюза і аздараўлення дзяцей у летніх аздараўленчых лагерах.

- Прафсаюзы адыгрываюць ключавую ролю ў абароне правоў работнікаў, паляпшэнні ўмоў працы і павышэнні ўзроўню жыцця. Ва ўмовах сучаснага свету, дзе змены адбываюцца імкліва, сталае навучанне прафсаюзнага актыву становіцца неабходнасцю для паспяховай працы прафсаюзаў, - рэзюмавала Таццяна Бяляцкая.

mogilev.1prof.by