Названы фіналісты конкурсу тэхнічных стартап-праектаў у Магілёве

У інкубатары малога прадпрымальніцтва ААТ «Магілёўскае агенцтва рэгіянальнага развіцця» адбыўся фінал абласнога конкурсу тэхнічных стартап–праектаў «IT–перспектыва». Арганізатарамі конкурсу выступілі Магілёўскае агенцтва рэгіянальнага развіцця, Камітэт эканомікі і Галоўнае ўпраўленне па адукацыі Магілёўскага аблвыканкама.

У гэтым годзе мерапрыемства было прысвечана актуальнай тэме: «Энергія разумнага спажывання: інавацыйныя падыходы да кіравання рэсурсамі».

У фінал выйшлі аўтары адзінаццаці найлепшых работ, адабраных на завочным этапе. Удзельнікі прадставілі свае распрацоўкі ў трох ключавых намінацыях: «Канструяванне і робататэхніка», «ІІ для вырашэння практычных задач», «Генератыўны ІІ: творчасць і кантэнт».

Абарона работ пачалася з намінацыі «Генератыўны штучны інтэлект». Школьнікі прадэманстравалі відэаролікі, згенераваныя з дапамогай нейрасетак. Тэматыка ролікаў ахоплівала не толькі пытанні энергазберажэння, але і больш глыбокія аспекты – беражлівыя адносіны да людзей.

У намінацыі «Штучны інтэлект для вырашэння практычных задач» былі прадстаўлены праекты, гатовыя да ўкаранення ў паўсядзённае жыццё. Сярод іх разумны галасавы памочнік для кіравання домам, праграма аналізу прадуктовых запасаў, якая прапануе рэцэпты з улікам наяўнай тэхнікі і падлікам затрат электраэнергіі, алгарытм рассадкі вучняў у класе, які ўлічвае іх перавагі і фізіялагічныя асаблівасці. Завяршалі праграму праекты ў намінацыі «Канструяванне і робататэхніка», дзе былі прадэманстраваны інжынерныя рашэнні і прататыпы прылад.

Традыцыйна ўсе ўдзельнікі заключнага этапу конкурсу атрымалі сертыфікат фіналіста. Не засталіся па–за ўвагай і іх педагогі. Арганізатары лічаць, што вылучэнне ролі настаўнікаў і ўручэнне ім падзяк падкрэслівае важнасць педагагічнай працы. Гэта стымулюе выкладчыкаў устаноў адукацыі вобласці больш актыўна займацца праектнай дзейнасцю з дзецьмі, шукаць новыя методыкі і падтрымліваць таленты. Усім настаўнікам уручаны падзякі за якасную падрыхтоўку школьнікаў.

Па выніках конкурсу журы вызначыла пераможцаў у кожнай з намінацый. Дыпломы I ступені атрымалі Варвара Смажанкова за праект «Яна – мая зямля», Аляксандра Паўлавец – праект «Энергія разумнага спажывання», Максім Бедуленка – праект «Лічбавы разумны электралічыльнік».

СБ, фота Магілёўскага агенцтва рэгіянальнага развіцця