Пераможцам тэатральнага фестывалю «M.@rt.кантакт» стаў спектакль «Жаніцьба. Фантасмагорыя»

Гран-пры XVII Міжнароднага маладзёжнага тэатральнага форуму «M.@rt.кантакт» атрымаў спектакль «Жаніцьба. Фантасмагорыя» Магілёўскага абласнога драматычнага тэатра, у пастаноўцы расійскага рэжысёра Сяргея Фядотава. Цырымонія ўзнагароджання адбылася 27 сакавіка - у Сусветны дзень тэатра.

«Для мяне зусім неверагоднымі былі гэтыя два месяцы працы. Я шчаслівы, што мой тэатр «Ля Моста» парадніўся з магілёўскім, - сказаў Сяргей Фядотаў. - Але я лічу, што гэтую ўзнагароду павінна атрымаць дырэктар абласнога драмтэатра Ірына Белякова. Гэта яе заслуга».

Падняўшыся на сцэну, Ірына Белякова падзялілася: «Эмоцыі перапаўняюць. Гэта быў вялікі, сур'ёзны, працяглы эксперымент. Увесь гэты час мы працавалі над гэтым спектаклем кожны дзень з раніцы да ночы. Хочацца падзякаваць Сяргею Фядотаву – для нашага тэатра гэта былі два месяцы майстар-класаў ад вялікага рэжысёра».

Прыз сімпатый гледачоў заваяваў спектакль «Мяцеліца» Дзяржаўнага акадэмічнага рускага драматычнага тэатра Рэспублікі Башкартастан (Уфа, Расія), у пастаноўцы рэжысёра Міхаіла Рабіновіча.

На думку маладзёжнага журы лепшым спектаклем форуму стала пастаноўка «Букоўскі» Нацыянальнага тэатра лялек Арменіі імя Аў. Туманяна (Ерэван, Арменія) - рэжысёр Марыета Даўлатбекян.

Акрамя таго, спецыяльнымі дыпломамі форуму былі адзначаны асобныя акцёры. Так, народная артыстка Кыргызскай Рэспублікі Назіра Мамбетава – «За яркае выкананне ролі Маці» ў спектаклі рэжысёра Уланмырзы Карыпбаева «Үмүт» Кыргызскага дзяржаўнага тэатра юнага гледача імя Бакена Кыдыкезстана (Біке Кыдыкестана). Актрыса Ганна Пятрова – «За яркае імправізацыйнае існаванне» ў спектаклі рэжысёра Нявены Міцявой «Дэкамерон» тэатра «Смех і сляза» (Сафія, Балгарыя). Акцёры Аляксандр Куляшоў і Марыя Рудакова – адпаведна за ролю Качкарова і ролю Агаф'і Ціханаўны ў спектаклі рэжысёра Сяргея Фядотава «Жаніцьба. Фантасмагорыя» Магілёўскага абласнога драмтэатра. Ігар Ключнікаў - за ролю Мішкі ў спектаклі рэжысёра Пятра Чыжова «Антарктыда» драматычнага тэатра «На Ліцейным» (Санкт-Пецярбург, Расія), Дзяніс Сякірын - за акцёрскае майстэрства ў выкананні ролі Смярдзякова ў спектаклі рэжысёра Кацярыны Максімавай «Смярдзякоў» ТАК» (Санкт-Пецярбург, Расія), Андрэй Грыгор'еў – за выкананне ролі Пака ў спектаклі Вікторыі Пячэрнікавай «Сон у летнюю ноч» Арлоўскага дзяржаўнага тэатра для дзяцей і моладзі «Свабодная прастора» (Арол, Расія), Зміцер Чуйкоў – за выкананне ролі доктара Палякова ў спектаклі Яўгена Карняга «Запіскі юнага ўрача» Беларускага дзяржаўнага тэатра лялек (Мінск, Беларусь). Таксама «За рэжысёрскае майстэрства» быў адзначаны заслужаны артыст, заслужаны дзеяч мастацтваў Расіі, заснавальнік, мастацкі кіраўнік і рэжысёр тэатра «Ля Моста» (Перм, Расія) Сяргей Фядотаў.

Уручаны ўзнагароды і творчым калектывам: «За арыгінальнае рашэнне дакументальнай п'есы» – спектакль рэжысёра Пятра Чыжова «Антарктыда» драматычнага тэатра «На Ліцейным» (Санкт-Пецярбург, Расія), «За акцёрскі ансамбль» – у спектаклі рэжысёра Карэна Нерсісяна «Людзі. Звяры. Акалічнасці» Ерэванскага дзяржаўнага рускага драматычнага тэатра ім. К.С. Станіслаўскага (Ерэван, Арменія), спектаклі рэжысёра Яўгеніі Гадун «Кошт задавальнення» Брэсцкага акадэмічнага тэатра драмы імя Ленінскага камсамола Беларусі (Брэст, Беларусь) і спектаклі рэжысёра Андрэя Багданава «Прыгоды Тома Соера» дзіцячага тэатра «Вера» (Ніжні Ноўгарад, Расія), «За раскрыццё тэмы кахання» – спектакль рэжысёра Уладзіміра Драздзецкага «Проста дзіўная дурніца» Тэрмітаўскага тэатра для дзяцей і юнацтва (Тэрмітаў, Казахстан), «За яркі акцёрскі ансамбль» – у спектаклі рэжысёра Сяргея Фядотава «Вій» (Перм, Расія), «За сучаснае ўвасабленне беларускай класікі» – спектакль рэжысёра Дзмітрыя Нунзіна «Несцерка» Магілёўскага абласнога тэатра драмы і камедыі імя У.І. Дуніна Марцінкевіча (Бабруйск, Беларусь), «За рыцарскае служэнне тэатру» – спектакль рэжысёра Мікалая Каляды «Тарас Бульба» «Каляда-тэатра» (Екацярынбург, Расія).

Таксама былі вызначаны пераможцы на думку маладзёжнага журы. За лаканічную і вобразную метамарфозу рамана ў тэатральную партытуру дыпломам адзначаны спектакль рэжысёра Кацярыны Максімавай «Смярдзякоў» камернага тэатра «ТОК» (Санкт-Пецярбург, Расія). За стварэнне ўнікальнай карціны свету спектакль Мікалая Каляды «Тарас Бульба» «Каляда-тэатра» (Екацярынбург, Расія). За візуальнае ўвасабленне свету фантазій «з якога мы ўсе створаны» - спектакль рэжысёра Вікторыі Пячэрнікавай «Сон у летнюю ноч» Арлоўскага дзяржаўнага тэатра «Свабодная прастора» (Арол, Расія)., а таксама акцёр гэтага тэатра Андрэй Грыгор'еў - за глыбіню і паветранасць акцёрскай трансфармацыі. За ўвасабленне трагічнай выявы маці – актрысе Назіры Мамбетавай у спектаклі рэжысёра Уланмырзы Карыпбаева «Үмүт» Кыргызскага дзяржаўнага тэатра юнага гледача імя Бакен Кыдыкеевай (Бішкек, Кыргызстан).