Першы этап абласнога тура рэспубліканскага праекта «100 ідэй для Беларусі» пройдзе ў фармаце elevator-speech

Першы этап абласнога тура рэспубліканскага моладзевага праекта «100 ідэй для Беларусі» пройдзе 26 лістапада ў інстытуце развіцця адукацыі. Пра гэта паведамілі ў абласным камітэце грамадскага аб’яднання «Беларускі рэспубліканскі саюз моладзі».

У першай палове дня маладыя наватары Магілёўшчыны пачнуць абарону сваіх праектаў у фармаце elevator-speech. Удзельнікі прэзентуюць уласныя ідэі перад экспертным саветам, а пасля атрымаюць магчымасць пачуць кампетэнтнае меркаванне аб далейшым развіцці праекта і яго прасоўванні.

Як адзначылі суразмоўцы, сёлета маладыя людзі прадставяць распрацоўкі ў 10-і намінацыях: «Энергетыка, у тым ліку атамная энергетыка, і энергаэфектыўнасць», «Агаропрамысловыя тэхналогіі і фермерства», «Прамысловыя і будаўнічыя тэхналогіі», «Ахова здароўя» (медыцынскія тэхналогіі, фармацыя, бія- і нанаіндустрыя), «Хімічныя тэхналогіі, нафтахімія», «Інфармацыйна-камунікацыйныя тэхналогіі», «Экалогія» (рацыянальнае прыродакарыстанне і глыбокая перапрацоўка прыродных рэсурсаў), «Нацыянальная бяспека і абарона ад надзвычайных сітуацый», «Грамадства і сацыяльная сфера», а таксама «Найлепшая бізнес-ідэя».

Праекты, якія трэба будзе абараніць распрацоўшчыкам, розныя і цікавыя. Напрыклад, горацкая моладзь прэзентуе мабільны інтэрнэт-банкінг для людзей з абмежаванымі магчымасцямі, маладыя людзі з Кіраўскага раёна папрацавалі над стварэннем беларускіх аўдыяказак для падрастаючага пакалення. Акрамя таго, эксперты пачуюць прапанову аб павелічэнні прысутнасці Рэспублікі Беларусь на рынку крыптавалют і атрыманні максімальнай выгады ад здабычы і продажу электронных манет. Яшчэ адзін праект раскажа аб перавазе энергаэфектыўнага спецадзення. Магілёўцы будуць прэзентаваць выкарыстанне біяраскладальных матэрыялаў, даступных для вырабу аднаразовага посуду, а таксама супрацьаварыйныя акуляры «AntiSleep» і інш.

Другі этап абласнога тура з узнагароджаннем адбудзецца ў снежні гэтага года.

Даведачна: праект «100 ідэй для Беларусі» на самую лепшую інавацыйную ідэю ў розных сферах сацыяльнага і эканамічнага развіцця краіны, цікавую для практычнай рэалізацыі, стартаваў у 2011 годзе па ініцыятыве БРСМ і стаў візітнай карткай моладзевай арганізацыі.