Абласны міжведамасны метадычны мост «Гульняманія ў падлеткаў: актуальнасць праблемы, шляхі вырашэння» па пытаннях папярэджання ў непаўналетніх гульнявой залежнасці, суіцыдальных праяў прайшоў 11 красавіка ў Магілёўскім абласным цэнтры творчасці. У ім прынялі ўдзел прадстаўнікі пракуратуры Магілёўскай вобласці, камісіі па справах непаўналетніх, сістэмы аховы здароўя, органаў унутраных спраў і іншых суб'ектаў прафілактыкі. Для ўдзелу ў ім былі запрошаны кіраўнікі раённых і гарадскіх метадычных аб'яднанняў педагогаў-псіхолагаў, намеснікі дырэктара па выхаваўчай і вучэбна-выхаваўчай рабоце ўстаноў агульнай сярэдняй, прафесійнай адукацыі, інтэрнатнага тыпу, педагогі-псіхолагі ўстаноў адукацыі абласнога падпарадкавання.
Як адзначыла намеснік начальніка галоўнага ўпраўлення па адукацыі Магаблвыканкама Ірына Кускова, мэта мерапрыемства - завастрыць увагу на пазначанай праблеме і ў фармаце жывога дыялогу з аўдыторыяй знайсці шляхі яе вырашэння:
«Прафілактыцы азартнай гульняманіі ў падлеткаў, з прычыны якой яны часам прымаюць неабдуманыя рашэнні, надаецца асаблівая ўвага. Захапляючыся камп'ютарнымі гульнямі, дзеці не ўсведамляюць, што гэта праблема, яны лічаць гэта сваім хобі. Упэўненыя, што гэта не зацягвае іх і яны ў любы момант могуць адмовіцца. Праведзенае анкетаванне паказала, што 25% апытаных лічаць азартныя гульні сваім захапленнем, у 40% была адзначана лёгкая ступень залежнасці, у 11% - цяжкая.
І зараджаецца гэтая праблема, нажаль, ужо ў малодшым і сярэднім школьным узросце. Таму мы сёння сабралі такую сур'ёзную аўдыторыю і па маштабах, і па значнасці. Запрасілі экспертаў, якія працуюць з гэтай тэмай і здольныя прафесійна данесці інфармацыю аб тым, як распазнаць залежнасць на пачатковым этапе, куды звяртацца, якія прымяняць методыкі работы з дзецьмі і, што вельмі важна, як выбудаваць работу з бацькамі. Гэта наша першачарговая задача».
Аб псіхалагічнай падаплёцы гульняманіі і яе магчымых прычынах расказала прысутным кандыдат псіхалагічных навук, дацэнт кафедры педагогікі і псіхалогіі Магілёўскага дзяржінстытута развіцця адукацыі Валянціна Аўраменка.
«Усе варыянты дапамогі павінны зыходзіць з адказу на пытанне «Чаму?». Чаму з усёй разнастайнасці жыцця дзіця выбрала гульню. Тут важны ўзрост, сям'я, адносіны, сябры, статус у класе, паспяховасць і шмат іншых фактараў. Яны могуць з'явіцца спускавым кручком для такіх паводзін і апусканні ў віртуальны мір. Даследаванняў на гэтую тэму мноства. Калі казаць пра аспекты сямейнага выхавання, то пры выяўленні праблем часта адзначаецца адсутнасць увагі, цеплыні, аўтарытарны падыход у выхаванні і цвёрды кантроль з боку бацькоў.
Масавае захапленне гульнямі пачынаецца бліжэй да падлеткавага ўзросту. Калі ўвагу малых можна пераключыць, яны рэагуюць на забароны, то падлеткі са сваім пачуццём даросласці, якое ў сям'і часта душыцца, знаходзяць аддушыну ў гульнях. Гэта кампенсацыя таго, што дзіця недаатрымлівае. Таму бацькам важна прымаць дзіця, цікавіцца яго захапленнямі. Але не ператвараць зносіны ў допыт, а імкнуцца зразумець, разабрацца.
А педагогам, перш за ўсё, трэба быць неабыякавымі і імкнуцца ўстанавіць кантакт з кожным, у той жа час гуртуючы ўвесь клас, нікога не вылучаючы і не супрацьпастаўляючы».
Намеснік начальніка аддзела па наглядзе за выкананнем заканадаўства аб непаўналетніх і моладзі пракуратуры Магілёўскай вобласці Дзяніс Хмялькоў, адказваючы на пытанні з залы аб адказнасці бацькоў за развіццё ў непаўналетняй гульнявой залежнасці, расказаў аб тым, што заканадаўствам яна не прадугледжана, аднак зламанае жыццё дзіцяці - куды больш сур'ёзнае пакаранне.
«Гаворачы пра ігральныя ўстановы, хацелася б адзначыць, што нягледзячы на тое, што такіх існуе нямала (14 - у Магілёве, 5 - у Бабруйску), у фармаванні залежнасці не яны адыгрываюць асноўную ролю, - падкрэсліў ён. - За апошнія 5 гадоў у нас не было зарэгістравана ніводнага сур'ёзнага здарэння з удзелам непаўналетніх, звязаных з працай такіх устаноў. Найперш, уся гэтая пагроза зыходзіць з інтэрнэту: сацыяльных сетак, сайтаў. Апошнія два выпадкі гібелі дзяцей у нашай вобласці былі звязаны непасрэдна з тым, што хлопцы захапляліся гульнямі праз інтэрнэт.
Больш увагі неабходна накіроўваць рабоце з бацькамі. Важна, каб у сям'і існаваў давер і ўзаемадзеянне. Неабходна цікавіцца з кім мае зносіны дзіця, чым захапляецца, якія сайты наведвае. Больш часу праводзіць з дзецьмі, умацоўваць адносіны праз сумесныя справы і заняткі, цікавіцца іх меркаваннем.
Інтэрнэт сёння як вораг, так і памагаты. Без яго ўжо не абысціся. Але і карыстацца ім трэба вучыць дзяцей правільна».
Удзельнікам сустрэчы таксама быў паказаны ролік з расповедам маці, якая сутыкнулася з трагедыяй і страціла сына з-за захаплення гульнямі. Пра праблемы і абавязкі свайго дзіцяці жанчына даведалася толькі з яго апошняй запіскі.
Арганізатары мерапрыемства адышлі ад фармату лекцыйнага занятку, каб атрымаць зваротную сувязь. У зале працаваў адкрыты мікрафон і кожны меў магчымасць выказацца ці задаць пытанне. Таксама пытанні да экспертаў перадавалі ў выглядзе запісак. Па выніках сустрэчы, як было анансавана падчас мерапрыемства, на сайце абласнога сацыяльна-педагагічнага цэнтра з'явіцца адпаведная рубрыка, дзе будуць сабраны методыкі і прапісаны алгарытм дзеянняў па рашэнні праблемы гульнявой залежнасці ў выпадку яе выяўлення.
Юлія Таранава, фота Галіны Гаўрыловіч
Пры выкарыстанні матэрыялаў актыўная гіперспасылка на mogilev-region.gov.by абавязковая
18.05.2024 - 16:59
18.05.2024 - 14:30
17.05.2024 - 17:59
17.05.2024 - 12:55
