Праваахоўнікам Магілёўскай вобласці ўручылі ўзнагароды напярэдадні Дня беларускай міліцыі

Праваахоўнікам Магілёўскай вобласці ўручылі дзяржаўныя і ведамасныя ўзнагароды падчас мітынгу, прысвечанага Дню ўтварэння беларускай міліцыі. Урачыстае мерапрыемства адбылося ля помніка байцам батальёна міліцыі капітана Уладзімірава ў вёсцы Гаі Магілёўскага раёна.

«Сёння, як і шмат гадоў таму, органы ўнутраных спраў надзейна абараняюць нацыянальную бяспеку дзяржавы, каштоўнасці і асновы нашага грамадства, – адзначыў начальнік УУС Магілёўскага аблвыканкама Ігар Шчарбачэня. – Супрацоўнікі беларускай міліцыі ўносяць значны ўклад у забеспячэнне спакойнага жыцця людзей. Асабовым складам праведзена вялікая работа па прафілактыцы правапарушэнняў, па раскрыцці злачынстваў па лініі крымінальнага вышуку, барацьбе з нарказлачыннасцю і кіберзлачыннасцю. Высокія вынікі ў службова-аператыўнай дзейнасці дасягнуты дзякуючы цеснаму ўзаемадзеянню органаў улады і ўсіх праваахоўных структур рэгіёна».

Ігар Шчарбачэня павіншаваў удастоеных высокіх узнагарод супрацоўнікаў і падкрэсліў, што іх асабліва ганарова атрымліваць у Год гістарычнай памяці ў такім знакавым месцы. Словы падзякі прагучалі на адрас ветэранаў за выхаванне маладога пакалення, а таксама бацькоў міліцыянераў, якія выхавалі годных афіцэраў, сапраўдных патрыётаў сваёй краіны. Шэрагу супрацоўнікаў і ветэранаў органаў унутраных спраў вобласці з рук начальніка УУС уручаны дзяржаўныя і ведамасныя ўзнагароды.

Ад імя Магілёўскага абласнога выканаўчага камітэта з надыходзячым прафесійным святам прысутных павіншаваў намеснік старшыні аблвыканкама Валерый Малашка. «Сёння мы з вамі знаходзімся ў святым месцы, дзе ў ліпені 1941 года на подступах да Магілёва падчас гераічнай абароны горада назаўжды застаўся амаль увесь батальён міліцыі капітана Уладзімірава, – сказаў ён. – Шэсць сутак без сну і адпачынку пад пякучым ліпеньскім сонцам і пастаянным агнём яны стаялі да смерці. І ў гады вайны, і ў мірны час міліцыя заўсёды стаяла на варце роднай зямлі, свайго народа».

Валерый Малашка падкрэсліў, што самаадданая служба і карпатлівая штодзённая праца праваахоўнікаў – гэта гарант спакою і абароненасці жыхароў рэгіёна. Так, канстытуцыйны рэферэндум прайшоў у працоўным рэжыме і добразычлівай абстаноўцы. Гэтага ўдалося дасягнуць дзякуючы зладжанай рабоце органаў унутраных спраў.

Сярод тых, каму былі ўручаны ўзнагароды за высокія паказчыкі ў службовай дзейнасці – намеснік начальніка крымінальнай міліцыі УУС Магілёўскага аблвыканкама Уладзіслаў Кавалёў. «Я працую ў органах унутраных спраў ужо 28 гадоў, увесь гэты час для мяне прыярытэтам застаецца бяспека нашых грамадзян і нашай краіны, – адзначыў ён. – Мы працуем на раскрыццё, выяўленне і прадухіленне злачынстваў, абараняем эканамічныя інтарэсы краіны. Мне сёння прыемна прымаць узнагароду ў такім знакавым месцы, бо ўсе ведаюць подзвіг батальёна Уладзімірава ў Вялікую Айчынную вайну. Медаль «За бездакорную службу» I ступені абавязвае мяне яшчэ лепш працаваць і імкнуцца да больш высокіх паказчыкаў».

Магіляўчанка Наталля Паркова невыпадкова аказалася на мітынгу: яна атрымала падзяку за годнае выхаванне сына Уладзіслава. «Прыемна, што адзначылі заслугі сына на ўзроўні міністэрства. Ён і цяпер на службе ў крымінальным вышуку, тры гады як скончыў Магілёўскі інстытут МУС. Гэта першы ў сям’і міліцыянер. Мяне бярэ гонар за сына. Хачу пажадаць яму толькі поспехаў у гэтай нялёгкай працы. Напярэдадні свята віншую ўсіх супрацоўнікаў міліцыі і ветэранаў, жадаю ім шчасця, моцнага здароўя і толькі мірнага неба».

Ва ўрачыстым мерапрыемстве таксама прынялі ўдзел начальнік Магілёўскага інстытута МУС Валерый Палішчук, начальнік абласнога ўпраўлення Дэпартамента аховы МУС Ігар Драчоў, прадстаўнікі іншых праваахоўных структур і ведамстваў рэгіёна, мясцовых органаў улады, дэпутаты, ветэраны органаў унутраных спраў, кадэты абласнога кадэцкага вучылішча і навучэнцы перадпрофільнага юрыдычнага класа гімназіі № 3. Яны ўсклалі да манумента кветкі і гірлянды, ушанавалі памяць загінулых хвілінай маўчання.

БЕЛТА