Адчувальныя пытанні для людзей і бюджэту. Аляксандр Лукашэнка сабраў нараду з кіраўніцтвам Саўміна

Прэзідэнт Беларусі Аляксандр Лукашэнка сабраў нараду з кіраўніцтвам Савета Міністраў. На парадак дня вынесены пытанні, для вырашэння якіх урад прапанаваў прымяніць некаторыя навацыі.

Першае пытанне прадугледжвае абнаўленне схемы фінансавання пастаўкі мінеральных угнаенняў у сельгасарганізацыі. Другое датычыцца трансфармацыі выплаты дапамог па доглядзе дзіцяці да трох гадоў. Трэцім пунктам прапанавана абмеркаваць мэтазгоднасць аб'яднання дзвюх дзяржаўных структур – Міністэрства прыродных рэсурсаў і аховы навакольнага асяроддзя і Дзяржінспекцыі аховы жывёльнага і расліннага свету.

«Усе пытанні адчувальныя для бюджэту, але самае галоўнае – для людзей», – звярнуў увагу ўдзельнікаў нарады Аляксандр Лукашэнка.

Аб абнаўленні схемы фінансавання пастаўкі мінеральных угнаенняў у сельгасарганізацыі

Гаворачы пра палітыку дзяржавы ў аграрнай сферы, Прэзідэнт запэўніў, што падтрымка вяскоўцаў будзе прадоўжана – пытанне толькі ў жорсткім кантролі за механізмам і аб'ёмамі такой падтрымкі. «Урад фарміруе штомесячныя графікі закупак угнаенняў па абласцях і вызначае крыніцы фінансавання. Гэта рэспубліканскі і мясцовыя бюджэты, уласныя сродкі сельгаспрадпрыемстваў і крэдытныя рэсурсы на льготных умовах перш за ўсё», – сказаў кіраўнік дзяржавы.

Прэзідэнт адзначыў, што ў цэлым карціна па краіне нармальная. «На 1 жніўня выбрана 92% ад квот мінеральных угнаенняў. Больш за 90% – гэта добры ўзровень выбаркі. Разам з тым асобныя рэгіёны на працягу года свае квоты поўнасцю не выкупляюць. Пад азімую сяўбу па азотнай і фосфарнай групах поўная выбарка толькі ў паловы абласцей. У чым прычына, калі ёсць сыравіна, як вы сцвярджаеце, крыніцы фінансавання вызначаны?» – задаў заканамернае пытанне Аляксандр Лукашэнка.

У сувязі з гэтым ён звярнуў увагу на, па сутнасці, тупіковую сітуацыю, у якой знаходзяцца вытворцы ўгнаенняў. Яны трымаюць на складах нявыпрацаваныя квоты і не атрымліваюць запланаванай выручкі. «Тавар амярцвёны. Ні на ўнутраны рынак не забралі, ні на знешні прадаць не могуць. Як я гаварыў раней, у цяперашняй сусветнай сітуацыі прадпрыемствы спакойна маглі б прадаць (угнаенні. – Заўвага БЕЛТА) на знешнім рынку, прычым па больш высокай цане», – канстатаваў кіраўнік дзяржавы.

«На будучы год прапануецца павялічыць закупку ўгнаенняў яшчэ на 18% для забеспячэння намечанага росту сельгасвытворчасці – гэта зразумела. Такім чынам, спатрэбіцца яшчэ больш грашовых сродкаў – усяго каля 3 млрд рублёў, а таксама наяўнасць рэальных крыніц фінансавання, – канстатаваў Аляксандр Лукашэнка. – Каб патанніць мінеральныя ўгнаенні для аграрыяў і забяспечыць выбарку квот, урад выпрацаваў новыя падыходы».

Савет Міністраў прапануе палову аплачваць за кошт рэспубліканскага бюджэту з накіраваннем непасрэдна заводам–вытворцам. На аплату другой паловы прапануецца выкарыстоўваць уласныя сродкі сельскагаспадарчых арганізацый, крэдыты, мясцовыя бюджэты. Адгрузку вытворца будзе рабіць толькі пасля поўнай аплаты. Кантроль за выкананнем будзе ўскладзены на старшынь аблвыканкамаў.

Кіраўнік дзяржавы папрасіў з дапамогай канкрэтных разлікаў, аргументавана паказаць, як новая схема паўплывае на фактычную цану ўгнаенняў для вяскоўцаў. «Нас хвалюе тое, што мы плацім грошы і якая ад гэтых грошай будзе эфектыўнасць, а не квоты перш за ўсё. І яшчэ: ці выключыць навацыя практыку пазапланавых зваротаў да Прэзідэнта за дадатковымі рэсурсамі? Самае галоўнае, ці будзе гэта матываваць умоўнага дырэктара круціцца, каб працаваць больш эфектыўна, калі мы ўсёй грамадой вырашаем яго праблемы?» – абазначыў шэраг пытанняў Аляксандр Лукашэнка.

Аб змяненні мер дзяржаўнай падтрымкі сем'яў з дзецьмі

У парадак дня мерапрыемства ўключаны разгляд прававога акта, які датычыцца выплаты дапамог па доглядзе дзяцей.

Кіраўнік дзяржавы падкрэсліў, што ў Беларусі бацькам аказваецца вельмі адчувальная матэрыяльная падтрымка. Ёсць аднаразовыя выплаты пры нараджэнні дзіцяці (каля 5 тыс. рублёў на першага і больш за 7 тыс. рублёў – на другога і наступных дзяцей). Існуе сямейны капітал для шматдзетных – больш за 35 тыс. рублёў на сёння. А таксама штомесячная дапамога – мінімум 1 тыс. рублёў.

«Здавалася б, нараджайце! На поўным дзяржаўным забеспячэнні дзеці. Але сучасны свет стаў занадта прагматычным. Маладыя людзі спачатку імкнуцца вырашыць іншыя пытанні – адукацыя, кар'ера, яшчэ чагосьці, а потым ужо нараджаць», – сказаў Прэзідэнт.

Аляксандр Лукашэнка звярнуў увагу, што ўсяго 10 гадоў таму ўзровень дабрабыту беларусаў быў у два разы ніжэй за сённяшні: ВУП на душу насельніцтва ў 2015 годзе – каля $18 тыс., у 2025 годзе – прыкладна $35 тыс. «Але дзетак нараджалася ў два разы больш тады, калі мы былі бядней (у 2015 годзе – амаль 120 тыс., у 2025 годзе – 55 тыс.)», – заўважыў кіраўнік дзяржавы.

«Каб мы не зніклі як нацыя і было каму працаваць, усё проста, як двойчы два: двое бацькоў – двое дзетак. Гэта база, як гаворыць моладзь. А лепш – трое і больш, – падкрэсліў Прэзідэнт. – Таму на дзяржаўным узроўні трэба знайсці дзейсную формулу, якая, па–першае, ажывіць дэмаграфічныя працэсы. Па–другое, стане матывацыяй да ўсвядомленых мяцярынства і бацькоўства, зробіць іх модным трэндам. Тады мы захаваем і прымножым сваё насельніцтва».

Для вырашэння дэмаграфічных задач урад прапанаваў кардынальна перагледзець меры дзяржаўнай падтрымкі сем'яў з дзецьмі. Прэзідэнт, перш чым прыйсці да канкрэтных рашэнняў у гэтай сферы, абазначыў прынцыповыя пытанні. «Ці ёсць гарантыя, што пашырэнне фінансавых стымулаў сапраўды надасць імпульс нараджальнасці?» – сказаў Аляксандр Лукашэнка. Кіраўнік дзяржавы спытаў таксама пра сусветны вопыт, доўгатэрміновы эфект (на пяць і больш гадоў) ад магутнай дзяржпадтрымкі і ўплыў на бюджэт, эканоміку краіны. 

Аб аб'яднанні Мінпрыроды і Дзяржінспекцыі аховы жывёльнага і расліннага свету 

Аляксандр Лукашэнка нагадаў, што гэта тэма ўзнікла пры назначэнні цяперашняга кіраўніка Мінпрыроды. «У няпростай сферы аховы прыроды і кантролю за прыродакарыстаннем гэтыя структуры працуюць зладжана і быццам бы паспяхова: выяўляюць злачынныя схемы, прадухіляюць розныя парушэнні. Напрыклад, браканьерства ў нас зведзена да мінімуму», – падкрэсліў ён. 

Разам з тым, як звярнуў увагу Прэзідэнт, акрамя браканьерства, у сферы аховы прыроды ёсць і іншыя праблемныя моманты. «Гэта ахова нашай прыроды, і тут трэба ўпісвацца максімальна, таму што гэта сапраўды наш набытак, – заявіў ён. – У цэнтры вялізнай цывілізацыі, Еўразійскага кантынента – самы чысты куток планеты. Нават дзіўна, што ўдалося захаваць». 

«Адпаведнай інспекцыі трэба не толькі з браканьерствам змагацца, але і з тымі, хто прывык гадзіць. Тут недапрацоўваюць і Міністэрства прыродных рэсурсаў, і інспекцыя. Таму не трэба гаварыць, што мы ўзялі бога за бараду – ёсць куча праблем, якія трэба вырашаць», – падкрэсліў кіраўнік дзяржавы. 

Аляксандр Лукашэнка адзначыў, што на першы погляд няма прыкметных перашкод, каб яшчэ больш аб'яднаць намаганні Мінпрыроды і Дзяржаўную інспекцыю аховы жывёльнага і расліннага свету. «Разам з тым ведаю, што Дзяржаўны сакратарыят Савета бяспекі гэту ініцыятыву не падтрымаў. Выслухаем меркаванні», – дадаў ён.

БЕЛТА