Пытанні ЖКГ, арэнды гандлёвых месцаў і зямельных адносін цікавілі тых, хто звярнуўся на асабісты прыём да Анатоля Ісачанкі

Старшыня Магілёўскага аблвыканкама Анатоль Ісачанка правёў сёння асабісты прыём грамадзян. Па садзейнічанне ў вырашэнні пытанняў па рамонце падмурка шматкватэрнага дома, рэалізацыі права на паляпшэнне жыллёвых умоў, непадаўжэння арэнды гандлёвага месца да яго звярнуліся жыхары абласнога цэнтра і Бабруйска.

Так, ад імя жыхароў дома па вуліцы Першамайскай у Магілёве на прыём прыйшоў адзін з іх. Мужчына расказаў, што некалькі гадоў таму яны звярнулі ўвагу на разбурэнне падмурка апорнай сцяны будынка пад уздзеяннем адталых і дажджавых вод. Акрамя таго, бянтэжыла жыхароў і пастаяннае падтапленне пляцоўкі перад пад'ездам, якое перакрывала шлях да дома. Пасля звароту да камунальных службаў і ўладаў горада, пажаданні жыхароў па ўхіленні недахопаў былі ўлічаны пры правядзенні капрамонту дома. Аднак, як сцвярджае мужчына, сітуацыю гэта не выправіла.

Старшыня Маггарвыканкама Аляксандр Студнеў, які прысутнічаў на сустрэчы, растлумачыў, што ў доме 1958 года пабудовы, было праведзена абследаванне сутарэннага памяшкання, якое паказала, што зацяканняў на дадзены момант няма. У час капітальнага рамонту былі выкананы ўсе неабходныя работы па водаадвядзенню. «Сёння мы дадаткова паставім пад'езд пад назіранне, каб ацаніць абстаноўку ў сезон актыўнага раставання снегу. Што тычыцца падтаплення ўваходнай групы, то тут будзе прадугледжана дадатковае водаадвядзенне», - пазначыў ён.

Анатоль Ісачанка даручыў узяць пытанне на кантроль і далажыць яму аб прынятых мерах па яго рашэнні.

З няпростай сітуацыяй сутыкнулася і шматдзетная сям'я магіляўчан, якая ў свой час яшчэ як маладая сям'я атрымала ўчастак пад будаўніцтва жылога дома ў Магілёўскім раёне.

«Цяпер у нас чацвёра дзяцей, пражываем у сціснутых умовах, таму стаялі ў чарзе на паляпшэнне жыллёвых умоў. Калі падышла наша чарга, нам агучылі магчымасць будаўніцтва кватэры. Аднак, калі даведаліся аб наяўнасці ўчастка, прапанавалі будаваць дом. Але складанасць у тым, што на нашым участку ўжо пабудаваў дом брат, каб не губляць зямлю, пакуль у нас не было на гэта сродкаў. І як зараз разабрацца ў сітуацыі, мы не разумеем», - распавёў кіраўнік сям'і.

Як патлумачыў начальнік галоўнага ўпраўлення юстыцыі Андрэй Сталяроў, у дадзеным выпадку вырашэнне пытання, у першую чаргу, залежыць ад узаемаадносін сваякоў: «Участак на дадзены момант зарэгістраваны за заяўнікамі. І нароўні з правам на ўчастак грамадзяне маюць усе правы і нясуць адказнасць за размешчаны на ім будынак. Таму неабходна дамаўляцца ўнутры сям'і».

Мужам агучылі магчымыя варыянты вырашэння іх сітуацыі. У тым ліку, кардынальныя - калі бакі не дамовяцца аб тым, каб блізкі чалавек саступіў дом на абумоўленых умовах, можа быць прынята рашэнне аб зносе самавольнай пабудовы. І сям'я зможа пачаць будаўніцтва сваёй хаты, атрымаўшы дзяржпадтрымку, на якую яны маюць права.

Старшыня аблвыканкама даў распараджэнне спецыялістам дапамагчы шматдзетнай сям'і выбудаваць правільны алгарытм іх дзеянняў згодна з заканадаўствам. А заяўнікам рэкамендаваў на сямейнай радзе дамовіцца аб аптымальным рашэнні.

Таксама на прыём да губернатара звярнуўся жыхар Бабруйска, які паскардзіўся, што ў жніўні кіраўніцтвам Бабруйскага рынку з ім была скасаваная дамова арэнды гандлёвых месцаў. З чым індывідуальны прадпрымальнік, ураджэнец Азербайджана, не пагадзіўся, аргументуючы гэта тым, што ўжо 15 гадоў увесь час пражывае ў Беларусі і ажыццяўляе гандаль на гэтых месцах. Аднак кіраўніцтва райцэнтра і гандлёвага аб'екта, прадстаўнікі органаў унутраных спраў растлумачылі, што апошнія некалькі гадоў мужчына сістэматычна дапускаў парушэнні правілаў гандлю, не аднойчы ў яго фіксавалася адсутнасць дакументаў на тавар - па ўсіх парушэннях складзеныя акты, пратаколы. На заўвагі індывідуальны прадпрымальнік не рэагаваў, больш за тое, дапускаў адміністрацыйныя правапарушэнні, ігнараваў аплату штрафаў. Ад прапанаваных альтэрнатыўных месцаў для арэнды адмовіўся. Хаця мужчыну папярэджвалі аб тым, што пры адсутнасці заробку на працягу паўгода яго дазвол на пражыванне можа быць ануляваны. Растлумачыць свае ўчынкі заяўнік не здолеў.

Анатоль Ісачанка даручыў афіцыйна, у пісьмовым выглядзе, праінфармаваць мужчыну аб прапанаваных яму варыянтах арэнды гандлёвых месцаў і яшчэ раз нагадаць аб адказнасці за невыкананне правіл і норм. Губернатар падкрэсліў, што ўсе, хто жыве ў Рэспубліцы Беларусь, павінны выконваць яе заканадаўства. З такой пазіцыяй пагадзіўся і старшыня абласнога грамадскага аб'яднання «Азербайджанская абшчына «Азеры» Ільяс Ільясаў, які прысутнічаў на прыёме.

Юлія Таранава, фота Алега Файніцкага, БЕЛТА