Рэгіянальны этап «Снежнага снайпера» стартаваў у Магілёўскім раёне

У Магілёўскім раёне на гарналыжным комплексе «Лыжэролерная траса Палыкавічы» стартаваў рэгіянальны этап спаборніцтваў сярод дзяцей і падлеткаў па біятлоне «Снежны снайпер» на прызы Прэзідэнцкага спартыўнага клуба ў сезоне 2022/23.

Спаборнічаць будуць юныя спартсмены ў трох узроставых групах: малодшай (2012-2013 гадоў нараджэння), сярэдняй (2010-2011) і старэйшай (2008-2009). Самыя трапныя і самыя хуткія будуць змагацца за ўзнагароды ў рэспубліканскім фінале. Сёння на старт выйшлі самыя юныя спартсмены - 46 хлопчыкаў і 46 дзяўчынак.

Удзельнікаў спаборніцтваў прывітаў начальнік упраўлення спорту і турызму Магілёўскага аблвыканкама Сяргей Новікаў. «Папярэдне планавалі, што спаборніцтвы будзем праводзіць у Чавусах. Але снежнае покрыва ў многіх раёнах Магілёўскай вобласці не дазваляе праводзіць такія спаборніцтвы, таму перанеслі іх у Палыкавічы, - расказаў ён. - Юным спартсменам хачу пажадаць дастойна прадставіць свой раён. Наймацнейшыя з вас будуць прымаць удзел у рэспубліканскім этапе «Снежнага снайпера» ў Раўбічах. Жадаю ўсім добрых вынікаў. Ну а тым, у каго нешта не атрымаецца, - не хвалявацца і працягваць трэніравацца далей. Трэнеры, якія сёння на спаборніцтвах у якасці суддзяў, могуць прыгледзецца, адабраць найбольш перспектыўных хлопцаў з раёнаў, магчыма, залічыць у спартыўную школу».

У «Снежным снайперы» прымаюць удзел дзеці з агульнаадукацыйных школ, якія не праходзяць падрыхтоўку ў спецыялізаваных навучальна-спартыўных установах, падкрэсліў Сяргей Новікаў.

Адным з удзельнікаў спаборніцтваў стаў Ілья Валадзькін з аграгарадка Стараселле Шклоўскага раёна. «Прыехаў, каб перамагчы. Бо ўжо другі раз пападаю сюды, але яшчэ ні разу нічога не заняў. Веру ў перамогу», - падзяліўся ён.

Яшчэ адна ўдзельніца спаборніцтваў - Маргарыта Андрэева з Бабруйска. «Прыехалі камандай са школы №30. Мы спадзяемся, што за гэтыя тры дні зможам заваяваць усе прызавыя месцы», - сказала юная спартсменка.

Усяго ў рэгіянальным этапе спаборніцтваў прымае ўдзел 21 каманда з раёнаў вобласці, яшчэ 2 - з Магілёва і Бабруйска, усяго 273 дзіцяці. Спаборнічаць яны будуць на працягу трох дзён, пераможцаў узнагародзяць 2 лютага.

БЕЛТА