24.02.2026 - 14:30

Стратэгія росту

Міжнародная бізнес-прэмія «Лідэр года – 2025» - чарговая ўзнагарода ў скарбонцы Дрыбінскай СПМК № 1. Лаўрэаты прэміі вызначаюцца экспертнымі парадамі з прадстаўнікоў бізнес-супольнасці, профільных міністэрстваў і ведамстваў, навукі. Будаўнічая арганізацыя з Дрыбіна ў апошнія гады з зайздроснай рэгулярнасцю выходзіць у лідэры прэстыжных рэспубліканскіх конкурсаў. У партфоліё - сотні пабудаваных і рэканструяваных аб'ектаў. Кампанія - адзін з пераможцаў рэспубліканскага конкурсу «Лідэры ў будаўніцтве – 2025», пераможца рэспубліканскага прафесійнага конкурсу «Лідэры ў будаўніцтве Рэспублікі Беларусь – 2024», а таксама рэспубліканскага конкурсу «Будаўнічы Алімп – 2024».


Дырэктар прадпрыемства Сяргей Кокіц прызнаецца, што сельгасаб'екты для яго самыя цікавыя — ад жывёлагадоўчых комплексаў да высокатэхналагічных перапрацоўчых прадпрыемстваў:

- У завяршальнай стадыі маштабная будоўля сучаснай вытворчасці сыроў у ААТ «Малочныя горкі». Новыя віды аб'ектаў стымулююць развіццё будаўнічай арганізацыі, патрабуючы ўкаранення інавацыйных тэхналогій, асваення сучасных матэрыялаў і павышэння кваліфікацыі персанала. На гэтым прадпрыемстве ў Горках мы навучыліся, напрыклад, зварцы нержавеючай сталі. Выйгралі тэндэр і вядзем работы па рэканструкцыі былога малаказавода ў Клімавічах. Яшчэ адзін важны праект - малочнатаварная ферма «Падарожнікі» ЗАТ «ААБ-Агра Гарадзец», якую ў верасні мінулага года наведваў Прэзідэнт і даручыў мадэрнізаваць.


На Дубровенскім ільнозаводзе дрыбінскае прадпрыемства раней рэканструявала цэх пад устаноўку ліній катанізацыі, зараз абнаўляе фасад. Таксама займаюцца капітальным рамонтам жылфонду, атрымалі сертыфікат на меліярацыю і ўжо пачалі работы ў шэрагу раёнаў вобласці.

Аб фінансавай стабільнасці і дынамічным развіцці сведчаць лічбы: калі за 2024 год выручка склала 15 мільёнаў 430 тысяч рублёў, то за 2025 ужо звыш 28 мільёнаў 246 тысяч рублёў.

Сёння ў Дрыбінскай будаўнічай арганізацыі 250 работнікаў, за 2025 год працаўладкаваны амаль 100 чалавек. Такі значны прырост - красамоўнае пацверджанне маштабавання бізнесу, росту аб'ёмаў вытворчасці.

З БДСГА падпісаны дагавор аб адкрыцці на прадпрыемстве філіяла кафедры па спецыяльнасці «сельскае будаўніцтва і добраўпарадкаванне тэрыторый», а таксама дагавор па падрыхтоўцы спецыялістаў.


Эфектыўным метадам рашэння кадравага пытання стала прыцягненне працоўных мігрантаў з Туркменістана. Цяпер на дрыбінскім прадпрыемстве іх ужо 38, плануюць у бліжэйшы час давесці колькасць да 50 чалавек. Памочнік дырэктара Наталля Давыдзенка тлумачыць, што ў сувязі з ростам аб'ёмаў будаўніцтва патрабуюцца працоўныя рукі:

- Працоўных мігрантаў пасялілі ў інтэрнаце, забяспечылі неабходнай бытавой тэхнікай. Заработная плата мінімум 2 тысячы рублёў - усё залежыць ад уменняў і старанняў. Многія прыязджаюць без асаблівых навыкаў, мы навучаем, галоўнае - жаданне працаваць і зарабляць.

26‑гадовы Агагелдзі Мурадаў прыехаўз Туркменістанавясной мінулагагода па парадзе знаёмага, маўляў, на дрыбінскім прадпрыемстве годны заробак і ўмовы пражывання. Агагелдзі прыбыў у Беларусь разам з жонкай, яна ўладкавалася на прадпрыемства ў Віцебску, выходныя праводзяць разам:

- У нас мара - пабудаваць дом, потым завесці дзяцей. Падабаецца, што тут ёсць магчымасць для працавітага чалавека максімальна выкласціся і атрымаць за гэта дастойны заробак. Гатую сабе сам, кахаю плоў, але вашы дранікі таксама ўсмакаваліся.


Цяпер Агагелдзі працуе на рэканструкцыі фермы ў вёсцы Навасёлкі Шклоўскага раёна. Навучыўся выконваць усё: ад аздобных прац да мантажу паілак з падагрэвам. Работы набліжаюцца да фінішу - і адразу пераезд на новую будпляцоўку. Старая ферма прыкметна змянілася. Празрысты дах, святловентыляцыйныя запавесы, новы вадаправод і выгульныя пляцоўкі - палепшаныя ўмовы для працы жывёлаводаў і камфортныя «апартаменты» для кароў павінны даць эканамічны вынік.

Прараб Дзмітрый Шышкоў адзначае: работнікі з Туркменістана не толькі самі працуюць сумленна, але і задаюць здаровую канкурэнцыю мясцовым будаўнікам. Сам Зміцер прыйшоў на прадпрыемства кіроўцам, затым завочна вучыўся ў сельгасакадэміі і адначасова асвойваў будаўнічыя працы:

- Альтэрнатыўнае рашэнне праблемы дэфіцыту працоўных рук - эканамічна апраўданая для развіцця прадпрыемства мера. У нас шмат аб'ектаў, якія пастаянна абнаўляем парк тэхнікі, але працоўныя рукі на будоўлі ўсё яшчэ незаменныя.


Замацаванне маладых спецыялістаў - ключавы індыкатар эфектыўнасці прадпрыемства.

Выпускніца Беларуска-Расійскага ўніверсітэта Кацярына Аверкава пяць гадоў таму па размеркаванні прыйшла сюда на адпрацоўку і засталася. Спачатку асвоіла спецыяльнасць каштарыса (суправаджэнне будаўнічых аб'ектаў, афармленне дакументаў на выкананыя работы), а потым ёй даверылі яшчэ і сертыфікацыю. За кошт арганізацыі Кацярына тройчы праходзіла навучальныя курсы:

- Для адаптацыі, матывацыі і ператварэння ўчорашняга студэнта ў каштоўны актыў важна даручэнне значных, а не толькі руцінных праектаў, што дазваляе хутчэй напрацаваць рэальны вопыт. Будаўніцтва - цікавая сфера для мяне, бо дае магчымасць уплываць на рэнтабельнасць праектаў, аб'ядноўваючы інжынерныя веды з эканомікай.


У дарожнай карце будаўнічай арганізацыі - новыя вытворчасці і абнаўленне тэхнікі. Толькі летась набылі 15 адзінак: самазвалы, пагрузчыкі, экскаватары, міксер, бульдозер. У планах новыя самазвалы.

Вытворчасць бетону і жалезабетонных вырабаў увайшло ў пералік інвестыцыйных праектаў «Рэгіянальная ініцыятыва». У будынку, якую набылі на аўкцыёне, неўзабаве ўсталююць абсталяванне. Наступныя пункты бізнес-плана - крама будматэрыялаў і піларама. Уласныя будматэрыялы знізяць сабекошт прац і аптымізуюць лагістыку.

Дырэктар прадпрыемства Сяргей Кокіц перакананы, што будучыня за зялёным будаўніцтвам: паўторнае выкарыстанне бетону, цэглы, дрэва і рознага віду адходаў дасць магчымасць вырашыць праблему рэсурсаў, знізіць затраты і пойдзе на карысць экалогіі. Цяпер дрыбінская арганізацыя актыўна вывучае перадавыя тэхналогі перапрацоўкі будаўнічых адходаў у Кітаі.

- У работнікаў нашага прадпрыемства ёсць упэўненасць у заўтрашнім дні. Будаўніцтва - лакмусавая паперка моцнай эканомікі: калі паўсюль будаўнічыя краны, то ў краіне ўсё добра. Найважнейшая задача - спыніць адток людзей з рэгіёнаў, а для гэтага патрэбны інвестыцыі ў развіццё прадпрыемстваў. Хачу пабудаваць такі аб'ект, каб Прэзідэнт паціснуў руку, - заключае Сяргей Пятровіч.

СБ