01.10.2026 - 17:35

Абласны фестываль–кірмаш працаўнікоў вёскі «Дажынкі–2026» пройдзе 10 кастрычніка ў Шклове.

У час правядзення свята з 9.00 да 21.00 будуць працаваць тэматычныя пляцоўкі, на якіх прадпрыемствы рэгіёнаў вобласці прадставяць сельскагаспадарчую прадукцыю, а таксама выстаўкі–прэзентацыі, якія адлюстроўваюць аграпрамысловы патэнцыял, дасягненні рэгіёнаў, турыстычныя, культурныя, прамысловыя і іншыя брэнды.

Акрамя таго, гасцей свята сустрэне выстава–кірмаш «Млын ураджаю», якая разгорнецца на Ленінскай і Фабрычнай вуліцах. А ў гарадскім парку тым часам будзе арганізавана работа пляцовак сярэдняй спецыяльнай адукацыі вобласці і Беларускага рэспубліканскага саюза моладзі з выставамі і майстар–класамі. Там жа разгорне тэматычную пляцоўку з паказальнымі выступленнямі і выставай тэхнікі Дэпартамент аховы, аналагічную актыўнасць арганізуе МНС на стаянцы ля раённага Дома культуры. Тут пройдзе выстава сельскагаспадарчай тэхнікі. А на пляцоўцы каля раённага Дома культуры – выстава фатаграфій «Наш гонар», прысвечаная ўборачнай кампаніі 2026 года. У сваю чаргу гандлёвыя рады па рэалізацыі мясной прадукцыі, каўбасных вырабаў, паўфабрыкатаў, хлебабулачных і кулінарных вырабаў, сувенірнай прадукцыі разгорнуцца па вул. Савецкая, Пралетарская, Янкі Купалы, Якуба Коласа.

З 10.00 да 18.00 у гарадскім парку будзе дзейнічаць інтэрактыўная дзіцячая пляцоўка, на якой дзяржаўныя ўстановы агульнай сярэдняй і дадатковай адукацыі дзяцей і моладзі Шклоўскага раёна прадставяць квэст–гульні, выставы, фотазоны, майстар–класы па дэкаратыўна–прыкладным мастацтве, роставыя лялькі, атракцыён.

У амфітэатры гарадскога парка з 10.00 да 12.50 і з 15.00 да 17.00 будзе працаваць дзіцячая канцэртная пляцоўка. Таксама тут прадугледжана спартыўная праграма – з 10.00 да 17.00. У праграме якой чакаюцца гульні лазертаг, воркаут, пнеўматычны цір, конкурсныя пляцоўкі «Футбол» і «Хакей», першынство па міні–футболе.

У ліку асноўных мерапрыемстваў фестывалю на Лядовай арэне з 10.00 да 11.00 адбудзецца цырымонія ўзнагароджання пераможцаў II і III ступені па асобных намінацыях абласнога спаборніцтва за дасягненне высокіх паказчыкаў на ўборцы ўраджаю збожжавых і зернебабовых раслін у 2026 годзе. А ў 13.00 на галоўнай канцэртнай пляцоўцы каля раённага Дома культуры пачнецца ўрачыстае мерапрыемства ўшаноўвання аграрыяў і святочны канцэрт «Слава людзям, што працуюць на зямлі!». У 17.00 адбудзецца ўрачыстае закрыццё фестывалю «Моладзь – за Саюзную дзяржаву» і гала–канцэрт лаўрэатаў конкурсу выканаўцаў маладзёжнай песні і мастацкіх калектываў, артыстаў эстрады.

Завершыць урачыстасць музычна–забаўляльная праграма з 20.00 і святочны феерверк у 21.00.

Рэд.