27.05.2026 - 10:12

З 5 па 7 чэрвеня ў Клімавічах пройдзе XXIV Міжнародны фестываль дзіцячай творчасці «Залатая пчолка». На працягу трох дзён горад стане пляцоўкай для вакальных і танцавальных конкурсаў, мастацкіх пленэраў, майстар–класаў, інтэрактыўных праграм і гала–канцэрта з узнагароджаннем лаўрэатаў.

У фестывалі прымуць удзел юныя артысты і творчыя калектывы, якія прадэманструюць свае здольнасці ў вакале, харэаграфіі, жывапісе і графіцы.

Першы дзень фестывалю – «Дзень творчасці і натхнення»

5 чэрвеня ўдзельнікаў чакаюць заезд, акрэдытацыя і экскурсійная праграма з наведваннем аб'ектаў гісторыка–культурнай спадчыны і раённага краязнаўчага музея.

У 15.00 у Клімавіцкім дзяржаўным аграрным каледжы пачнецца конкурснае праслухоўванне ў намінацыі «Эстрадны вакал. Салісты» сярод удзельнікаў 9–12 гадоў.

З 15.00 у парку Народнага адзінства будзе працаваць інтэрактыўная пляцоўка «У краіне гульняў». Гасцей чакаюць творчыя пляцоўкі ўстаноў культуры, дзіцячыя гульні, майстар–класы майстроў дэкаратыўна–прыкладной творчасці і выстава–продаж сувенірнай прадукцыі раёнаў Магілёўскай вобласці.

З 18.00 на плошчы 50 гадоў Вялікага Кастрычніка разгорнецца тэматычная пляцоўка МНС «Бяспечнае дзяцінства».

Урачыстае адкрыццё фестывалю адбудзецца ў 20.30 на плошчы «Фестывальная». У 22.00 свята завершыцца феерверкам.

Другі дзень – «Лета, сонца, сяброўства – вось што дзецям трэба»

6 чэрвеня ў 11.00 стартуюць конкурсныя праслухоўванні ў намінацыях:

«Народны вакал. Салісты»;

«Народны вакал. Ансамблі»;

«Эстрадны вакал. Салісты»;

«Эстрадны вакал. Ансамблі».

У 11.30 у раённым Цэнтры культуры пачнецца конкурсны прагляд калектываў сучаснага танца. У 14.00 выступяць калектывы народна–стылізаванага танца, а ў 16.00 – калектывы народна–сцэнічнага танца.

Таксама ў 11.00 у парку Народнага адзінства стартуе пленэр–конкурс «Як цудоўны гэты свет» для ўдзельнікаў намінацый «Жывапіс» і «Графіка».

З 11.00 да 18.00 тут жа будуць працаваць прафарыентацыйныя экспазіцыі «Паўднёва–ўсходні рэгіён: адукацыя і кар'ера», а з 12.00 у амфітэатры пройдзе марафон агітбрыгад #ПрофіБудуЯ.

Конкурсная праграма «Міс Залатая пчолка» сярод дзяцей Клімавічаў пачнецца ў 16.00 у амфітэатры.

Увечары, у 20.30, гасцей фестывалю запросяць на танцавальную праграму «Дыска Лета» на плошчы «Фестывальная».

Фінальны дзень – «Запалі сваю зорку»

7 чэрвеня з 10.30 у Клімавічах пачнуць працаваць інтэрактыўныя пляцоўкі дэкаратыўна–прыкладнога мастацтва і выставы–продажы вырабаў майстроў.

У гэты ж час для кіраўнікоў удзельнікаў арганізуюць майстар–класы па вакале, харэаграфіі, жывапісе і графіцы з удзелам членаў журы фестывалю.

Галоўнай падзеяй заключнага дня стане цырымонія ўзнагароджання лаўрэатаў XXIV Міжнароднага фестывалю дзіцячай творчасці «Залатая пчолка» і гала–канцэрт, якія пачнуцца ў 13.00 на плошчы «Фестывальная».

Рэд.