17.08.2026 - 09:33

У Касцюковіцкім раёне 21 жніўня адзначаць традыцыйнае раённае свята «Цыбуляў дзень». Пра гэта расказалі ў раённым Цэнтры культуры.

Свята, прысвечанае шчодраму ўраджаю і самабытным народным традыцыям, разгорнецца ў аграгарадку Тупічына. Старт мерапрыемству ў 17.00 дасць маштабны тэатралізаваны паказ. А адразу за ім – вялікі творчы канцэрт з нумарамі калектываў раёна і артыстаў Цэнтра культуры.

Арганізуюць у аграгарадку і тэматычныя лакацыі. Тут разгорнецца выстава ўраджаю цыбулі: плён сваёй працы прадэманструюць мясцовыя жыхары і гаспадаркі. Непадалёк будзе працаваць выстава–кірмаш вырабаў ручной працы, дэкаратыўна–прыкладнога мастацтва – майстры абяцаюць усім дзіўныя вырабы і сувеніры.

Інтэрактывы для дарослых і дзяцей, фотазоны, разнастайныя пачастункі і гандлёвыя рады – кожны зможа знайсці нешта цікавае.

БЕЛТА