13.02.2026 - 12:14

У Дрыбінскім раённым гісторыка-этнаграфічным музеі на валёнкі можна не толькі паглядзець, але і атрымаць майстар-клас ад майстроў. Творчасць шапавалаў Дрыбінскага раёна ў свой час атрымала статус гісторыка-культурнай каштоўнасці Беларусі. Унікальныя вырабы з воўны тут вырабляюць з XVIII стагоддзя. На майстар-класы і проста па валёнкі сюды прыязджаюць нават з Расіі.


Кіраўнік народнай студыі «Шапавал» Людміла Лугаўцова расказвае, што для стварэння аб'ёмных узораў мясцовыя майстрыхі выкарыстоўваюць тэхніку фелтынгу, гэта значыць сухое валянне поўсцю:

— Модніцы любяць валёнкі больш яскравыя з яркімі кветкамі, мужчыны — з беларускім арнаментам. Таксама з воўны валяюць рукавіцы, шапкі, тэпцікі і нават упрыгожванні. Традыцыйнае рамяство ў нас асвойваюць і дзеткі ў гуртку пры музеі.


Дрыбінскія майстры з гонарам расказваюць, што валёнкі — гэта натуральны, цёплы і карысны для здароўя абутак з воўны, які забяспечвае ідэальную тэрмарэгуляцыю: ногі не мерзнуць у мароз і не пацеюць у памяшканні. Лямец прапускае паветра, убірае вільгаць, а які змяшчаецца ў поўсці ланалін аказвае лячэбнае ўздзеянне пры сустаўных болях, радыкуліце, стымулюе кровазварот і паскарае гаенне.

СБ