З боку моладзі важнае разуменне значнасці любой электаральнай кампаніі ў краіне. Такім меркаваннем з журналістамі падзяліўся рэктар Магілёўскага дзяржаўнага ўніверсітэта імя А.А.Куляшова Дзяніс Дук на пасяджэнні ЦВК у Магілёве.
«Прававая асвета - вельмі шматграннае паняцце, - адзначыў Дзяніс Дук. - Менавіта таму мы імкнемся прыцягнуць моладзь, якая павінна быць правадніком нашых ідэй у сваё асяроддзе, каб кожная выбарчая кампанія, у якую ўліваецца вялікая колькасць тых, хто ўпершыню галасуе, праходзіла на добрым арганізацыйным узроўні. Таксама важнае з боку нашай моладзі разуменне значнасці любой электаральнай кампаніі ў краіне».
Па словах Дзяніса Дука, прававая культура беларусаў знаходзіцца на высокім узроўні. Гэты назапашаны досвед трэба перадаваць моладзі, у якой у сваю чаргу ёсць запатрабаванасць у гэтым. «Гэтая запатрабаванасць фармалізуецца ў Моладзевым савеце пры Цэнтральнай выбарчай камісіі, а таксама ў нашай студэнцкай і школьнай моладзі, - падкрэсліў ён. - Нездарма Міністэрства адукацыі надае павышаную ўвагу ўсім катэгорыям навучэнцаў, пачынаючы з дзіцячага сада да студэнцкага асяроддзя».
«Выбарчая культура ў дзіцячым садку закладвае разуменне аб лідэрскіх якасцях, якія грунтуюцца на агульначалавечых каштоўнасцях, - растлумачыў Дзяніс Дук. - Гэта базавы ўзровень, з якога пачынаецца патрыятызм і любоў да Радзімы. Гэта таксама першае знаёмства з беларускай сімволікай - сцягам, гербам і гімнам краіны, закладзенымі ў іх сэнсамі. Далей па ланцужку значэнне гэтых сімвалаў раскрываецца ў школе, адбываецца асэнсаванне прававой культуры ў гістарычным аспекце. І зараз, будучы ўжо студэнтамі, маладыя людзі замацоўваюць гэта на навуковым узроўні».
БЕЛТА
