Рух па мосце праз раку Сож адкрылі ў Слаўгарадскім раёне

Рух транспарту адкрыты па мосце праз раку Сож да Блакітнай крыніцы ў Слаўгарадскім раёне. Пра гэта паведаміў намеснік старшыні Слаўгарадскага райвыканкама Аляксандр Асмалоўскі.

«Мы завяршылі ўсе асноўныя віды работ. У 2020 годзе дапрацуем пад’езды да моста, правядзём умацаванне левабярэжнай часткі ў абласцях, якія падтапляюцца, зборным жалезабетонам, нанясём разметку і ўстановім дарожныя знакі. Усё гэта будзе зроблена да 3 ліпеня», – адзначыў Аляксандр Асмалоўскі.

Працягласць моста – амаль 500 м. Ён злучыў два раёны – Слаўгарадскі і Краснапольскі – і забяспечыў паміж імі бесперабойны рух. Да гэтага жыхары раёнаў у цёплы сезон карысталіся пантоннай пераправай і лодкамі. З надыходам халадоў даўжыня шляху ў аб’езд складала больш за 100 км, з якіх каля 50 км – лясныя і жвіровыя дарогі.

«Ужо распрацаваны праект па развіцці левабярэжжа Сожа. Тут будзе створаны экатурыстычны парк «Амулет Прысожжа», у які ўвойдуць вёскі, турыстычныя маршруты для пешых і веласіпедных прагулак, а таксама закладзены ландшафтны парк у раёне Блакітнай крыніцы. Гэта тэрыторыя выклікае вялікую цікавасць у турыстаў. Мы плануем стварыць тут усе ўмовы для адпачынку сем’ямі і кампаніямі, а таксама развіць інфраструктуру для «жывых» пасёлкаў. Доўгі час адрэзанымі ад нас заставалася 8 населеных пунктаў. Нешматлікасць насельніцтва абумоўлена праблемамі з транспартнымі зносінамі. Спадзяёмся, што са з’яўленнем пастаяннага моста мы зможам выправіць і палепшыць сітуацыю на левым беразе Сожа», – расказала старшыня Слаўгарадскага раённага Савета дэпутатаў Святлана Язерская.

На гэты момант на будаўніцтва маставога пераходу праз раку Сож на 4,646 км аўтамабільнай дарогі Р140 Слаўгарад – Краснаполле выдаткавана каля Br30 млн. Усяго на рэалізацыю праекта выдзелена каля Br43 млн., ён фінансуецца за кошт сродкаў рэспубліканскага бюджэту.

БЕЛТА