Сенатар Віктар Ананіч расказаў пра прыярытэты дабрачыннай дзейнасці ў Магілёўскай вобласці

У канцы года многія падводзяць вынікі працы і дзеляцца планамі на будучыню. Папрасілі члена Савета Рэспублікі ад Магілёўскай вобласці, старшыню праўлення Беларусбанка Віктара Ананіча падзяліцца галоўным са сваёй сенатарскай дзейнасці ў рэгіёне.

– За два гады майго сенатарства было ініцыявана нямала праектаў і акцый, накіраваных на падтрымку самых розных арганізацый, раёнаў і галін Магілёўшчыны, – адзначае сенатар. – Усяго і не пералічыць, але на самым важным спынюся.

Па словах Віктара Ананіча, з улікам эпідэміялагічнай абстаноўкі апошніх двух гадоў асаблівая ўвага яго як сенатара, кіраўніка найбуйнейшага банка ў цэлым была накіравана на падтрымку сістэмы аховы здароўя. Дапамога на набыццё абсталявання і ўмацаванне матэрыяльна-тэхнічнай базы за гэты перыяд атрымалі: у Бабруйску – гарадская дзіцячая і цэнтральная бальніцы; паліклініка ў Магілёве; Краснапольская, Касцюковіцкая, Быхаўская, Крычаўская, Горацкая цэнтральныя раённыя медустановы. Гаворка ідзе аб агульнай суме каля 300 000 рублёў. На гэтыя сродкі набываліся дэфібрылятар, прыложкавыя маніторы, эндаскапічнае абсталяванне, рэанімацыйныя ложкі. Акрамя таго, гэтым установам пастаянна аказвалася дапамога ў выглядзе СІА для медперсаналу.

Яшчэ адна сфера, якая актыўна падтрымлівалася сенатарам, – сацыяльная. У прыватнасці, цэнтры карэкцыйна-развіваючага навучання і рэабілітацыі рэгіёна. Так, для Магілёўскага гарадскога цэнтра было набыта гульнявое абсталяванне, у Касцюковіцкім – абсталяваны сэнсарны пакой, закуплены цацкі і канцтавары, у Быхаўскім – з’явілася пляцоўка і альтанка для дзяцей, шмат новых цацак. Для Клімавіцкага цэнтра закуплена спецыяльная мэбля для дзяцей-інвалідаў.

– Падтрымліваць дзяцей, асабліва тых, якія маюць патрэбу ў спецыяльным доглядзе і рэабілітацыі, – гэта важная і добрая справа, – гаворыць сенатар. – Магчыма, мы не зможам да канца вылечыць іх хваробы, але дзякуючы добраму догляду і арганізацыі развіцця значна палепшым якасць жыцця.

Дарэчы, клопат аб падрастаючым пакаленні таксама важны складнік дзейнасці Віктара Ананіча. У Быхаве і Шклоўскім раёне размешчаны дзіцячыя дамы сямейнага тыпу сем’яў Шушлаковых і Канаваленка, катэджы для якіх пабудаваў Беларусбанк у межах дабрачыннага праекта «Бацькоўскі дом».

– І я, і калегі – частыя госці ў гэтых сем’ях. Абавязкова прыязджаем да святаў, бачым, як дзеці падрастаюць і змяняюцца. Штогод выдзяляем грошы на іх падрыхтоўку да новага навучальнага года, прывозім падарункі і сертыфікаты да Дня абароны дзяцей, Новага года, іншых святаў. Падтрымку сем’ям аказваюць і грамадскія арганізацыі банка, – удакладняе Віктар Ананіч.

А для развіцця спорту і здаровага ладу жыцця ў рэгіёне па ініцыятыве сенатара абсталююцца спартыўныя і варкаўт-пляцоўкі (у Касцюковічах і Быхаве), якія хутка становяцца любімым месцам правядзення часу для падлеткаў. Дзіцячыя дашкольныя і школьныя ўстановы атрымліваюць спартыўны і гульнявы інвентар. На гэта накіравана больш за 60 000 рублёў.

– Практыкуем таксама перадачу невыкарыстоўваемай у банку маёмасці, – удакладняе член Савета Рэспублікі. – Камп’ютары, офісную мэблю, аргтэхніку, аўтамабілі перадаём у дзіцячыя сады, школы, ліцэі, грамадскія арганізацыі.

Любыя звароты, якія паступаюць Віктару Ананічу падчас прамых тэлефонных ліній і прыёмаў грамадзян, разглядаюцца ў індывідуальным парадку і старанна аналізуюцца.

– Часам звяртаюцца людзі і нават цэлыя сем’і, якія трапілі ў няпростыя жыццёвыя сітуацыі. І калі іх выслухаеш, паглыбішся, то разумееш, што без нашай дапамогі ім не справіцца, – прызнаецца Віктар Ананіч.

Дарэчы, і сферу культуры сенатар і банк не пакідаюць без увагі. Ужо на працягу шэрагу гадоў садзейнічаюць правядзенню свята «Купалле», якое стала сапраўдным брэндам рэгіёна.

Гэтых прыярытэтаў сенатар плануе прытрымлівацца і ў будучай сваёй дзейнасці. Але ўдакладняе, што да кожнага рашэння аб падтрымцы, выдзяленні сродкаў заўсёды падыходзіць узважана, з улікам аналізу ўсіх фактараў.

БЕЛТА