Штангістка Дар'я Навумава панясе беларускі сцяг на цырымоніі адкрыцця Гульняў БРІКС

Член нацыянальнай каманды па цяжкай атлетыцы, ураджэнка Магілёўскай вобласці Дар'я Навумава стане сцяганосцам беларускай дэлегацыі на цырымоніі адкрыцця Гульняў БРІКС, паведамілі ў прэс-службе Мінспорту.

Цырымонія адкрыцця Гульняў краін БРІКС адбудзецца 12 чэрвеня ў Казані.

Дар'я Навумава з'яўляецца сярэбранай медалісткай Алімпійскіх гульняў 2016 года і чэмпіянату свету 2018 года, а таксама чэмпіёнкай Еўропы-2019. Цырымонія адкрыцця Гульняў БРІКС пройдзе сёння ў МВЦ «Казань Экспа», пачатак - у 19.00. Многія беларускія спартсмены ўжо дабраліся да месца правядзення аднаго з галоўных стартаў сезона: у сталіцу Татарстана прыбылі каманды па сінхронным плаванні, цяжкай атлетыцы, самба і ушу. Спаборніцтвы ў гэтых відах спорту стартуюць ужо заўтра.

Усяго ўдзел у Гульнях БРІКС у Казані прымуць больш за пяць тысяч спартсменаў з 93 краін, якія разыграюць 392 камплекты медалёў. У беларускую дэлегацыю ўвайшлі больш за 600 чалавек - каля 400 атлетаў, а таксама трэнеры, суддзі, кіраўнікі і прадстаўнікі федэрацый. Гульні краін БРІКС прадоўжацца па 23 чэрвеня.

БЕЛТА