«Сілавікі – асноўнае звяно нацыянальнай бяспекі, і заўсёды гатовыя выканаць пастаўленыя задачы»

Такім меркаваннем падзяліўся камандзір атрада міліцыі асаблівага прызначэння УУС Магілёўскага аблвыканкама Мікалай Гарэлікаў.

– АМАП – гэта першы эшалон рэагавання на розныя сітуацыі. Байцы затрымліваюць узброеных злачынцаў; шукаюць асоб, якія ўчынілі цяжкія злачынствы, знаходзяцца ў вышуку; спыняюць дзейнасць узброеных груп і асоб, якяя аказваюць узброенае супраціўленне; забяспечваюць ахову грамадскага парадку пры правядзенні масавых мерапрыемстваў; спыняюць масавыя беспарадкі і групавыя парушэнні грамадскага парадку. Часам на заданні яны бесперапынна знаходзяцца суткі і больш. Таму адбор у нашы рады сур’ёзны па многіх паказчыках, уключаючы псіхалагічны партрэт, фізічную падрыхтоўку, узровень адукаванасці, стан здароўя, адсутнасць сувязяў з крымінальным светам і нават дробных правапарушэнняў. І абавязковы момант: кандыдат павінен быць патрыётам сваёй краіны, – падкрэсліў Мікалай Іванавіч.

Дзякуючы граматна выбудаванай прафарыентацыйнай працы жадаючых служыць у АМАП нямала. Усе падраздзяленні атрада міліцыі займаюцца азнаямленнем школьнікаў са сваёй дзейнасцю, уключаючы гутаркі, паказальныя выступленні, выставы тэхнічных сродкаў. Усё гэта арыентуе моладзь на працу ў сілавых структурах, выхоўвае ў падлеткаў пачуццё патрыятызму. Але і наступны адсеў таксама ёсць, бо рамантызм фільмаў і прывабны знешні імідж хутка знікае ў працоўных буднях. Працяглыя камандзіроўкі, сур’ёзныя нагрузкі, небяспека службы – не кожны да гэтага гатовы. Затое тыя, што засталіся, – згуртаваны касцяк, сапраўднае братэрства, якое разумее, што служыць Радзіме!

Сёння ў Беларусі адзначаюць Дзень утварэння атрадаў міліцыі асаблівага прызначэння органаў унутраных спраў.

– Віншую ветэранаў службы. Жадаю здароўя, моцы духу, жыццёвага аптымізму, – адзначыў Мікалай Гарэлікаў. – Дзеючым байцам жадаю, каб колькасць выездаў раўнялася колькасці вяртанняў. І прафесіяналізму, які сапраўды неабходны, асабліва з улікам цяперашняй ваенна-палітычнай абстаноўкі. Сілавікі – асноўнае звяно нацыянальнай бяспекі, і атрады заўсёды гатовыя выканаць пастаўленыя задачы. Будзьце сапраўднымі патрыётамі сваёй краіны, прыкладам сваім блізкім і акружаючым. Годна нясіце па жыцці наш дэвіз: «Законнасць, гонар, адвага»!

СБ