Больш за 140 штангістаў бяруць удзел у чэмпіянаце Беларусі ў Магілёве

Сталі вядомы першыя пераможцы і прызёры чэмпіянату Беларусі па цяжкай атлетыцы, які стартаваў у Магілёве.

Спаборніцтвы сабралі больш за 140 штангістаў з усёй краіны. У першы дзень нацыянальнага першынства былі разыграны тры камплекты ўзнагарод. У катэгорыі да 49 кг у дзяўчат перамогу атрымала Варвара Барадзінава з Віцебска, якая набрала ў суме за рывок і штуршок 154 кг. Другое і трэцяе месцы занялі магіляўчанкі Кацярына Кульбацкая (136) і Карына Людагоўская (126).

У вазе да 53 кг лепшы вынік паказала прадстаўніца Добруша Юлія Кацянёва (185 кг), серабро ўзяла Паліна Смародзінава з Бярозы (163), тройку замкнула мясцовая спартсменка Анастасія Клімава (154). У хлопцаў у катэгорыі да 60 кг золата заваяваў віцяблянін Аляксандр Мацькін, які на адзін кілаграм апярэдзіў гамяльчаніна Кірыла Віннікава (229 супраць 228). Бронзу ўзяў Эдуард Рымша з Полацка (210).

Усяго ў стартавы дзень на магілёўскі памост выходзілі 30 штангістаў, турнір працягнецца па 29 жніўня. Па выніках чэмпіянату Беларусі па цяжкай атлетыцы будуць сфарміраваны каманды для ўдзелу ў юніёрскім і маладзёжным першынствах Еўропы, а таксама на галоўным дарослым старце сезона – сусветным форуме ў Кітаі.

БЕЛТА