26.01.2026 - 16:22

Пячэрскі лесапарк у Магілёве 31 студзеня зноў стане цэнтрам прыцягнення для аматараў актыўнага ладу жыцця. Пасля шэрагу бясснежных зім, якія не дазвалялі правесці старты на поўную моц, гарадское спартыўнае свята «Магілёўская лыжня — 2026» нарэшце вяртаецца ў сваім сапраўдным маштабе.

На лыжню запрашаюць і дзяцей, і дарослых. Наймацнейшых вызначаць у дзевяці ўзроставых катэгорыях: да 10 гадоў, 11-14 гадоў, 15-17 гадоў, 18-29 гадоў, 30-39 гадоў, 40-49 гадоў, 50-59 гадоў, 60-69 гадоў, 70 гадоў і старэй. Важна - удзельнічаць у спаборніцтвах могуць усе жадаючыя, але пры наяўнасці допуску лекара.

Трыумфатараў гонак адзначаць заслужанымі медалямі і дыпломамі, але, як адзначаюць арганізатары, галоўнай узнагародай для кожнага стане зарад бадзёрасці і здароўя.

Дарэчы, «Магілёўская лыжня» абяцае стаць выдатным варыянтам для сямейнага адпачынку ў выхадны дзень. Тых, хто не плануе выходзіць на дыстанцыю, чакае насычаная канцэртна-забаўляльная праграма. Традыцыйна ў Пячэрскім лесапарку разгорнецца і палявая кухня. Сагрэцца і аднавіць сілы можна будзе гарачай салдацкай кашай і духмянай гарбатай. Для тых, у каго няма ўласнай амуніцыі, але ёсць жаданне далучыцца да зімовага драйву, арганізуюць пракат лыжнага інвентара.

Урачыстае адкрыццё свята - у 11:00.

СБ