11.03.2026 - 09:59

У суботу, 14 сакавіка, у зале гульнявых відаў спорту спарткомплексу «Алімпіец» у Магілёве збяруцца спартсмены з усіх рэгіёнаў краіны і Мінска. Тут два дні будзе праходзіць XXXIII адкрыты традыцыйны турнір па дзюдо памяці Героя Савецкага Саюза, воіна–інтэрнацыяналіста Андрэя Мельнікава, імя якога стала сімвалам мужнасці для магіляўчан.

Гэта быў звычайны хлопец, да войска працаваў у саўгасе «Дняпроўскі» на Магілёўшчыне, у 17 гадоў ажаніўся. Падчас вайны ў Аўганістане кулямётчык Андрэй Мельнікаў прымаў удзел у баявых аперацыях. Стаў адным з тых самых герояў 9–й роты, якія змагаліся 7 і 8 студзеня 1988 гады ў баях за вышыню 3234 з праўзыходнымі сіламі суперніка. Пры абароне вышыні загінуў. Яму было ўсяго 19 год. Дома засталіся мама, жонка, паўтарагадовая дачка. Звання Героя Савецкага Саюза быў удастоены пасмяротна. Пахаваны ў Магілёве, дзе ў яго гонар названа адна са школ, алея, устаноўлены памятны знак.

– У Магілёве з 1989 года праходзіць турнір па дзюдо ў яго гонар, – удакладняе заснавальнік турніру Барыс Жылін, які цяпер працуе кіраўніком па ваенна–патрыятычным выхаванні ў магілёўскай СШ № 34. – У першым, усесаюзным турніры бралі ўдзел каля 180 чалавек, выключна мужчын. Пасля распаду Саюза да нас прыязджалі прадстаўнікі ўсіх рэспублік былога СССР. За гэтыя гады праз турнір прайшлі больш за 10 тысяч удзельнікаў. На гэты раз спаборнічаць за званне лепшага дзюдаіста будуць юнакі і дзяўчаты ва ўзросце да 21 года, усяго каля 200 чалавек. Кожны раз на турнір мы запрашаем маці Андрэя Мельнікава, яго дачку Машу, яе дзяцей. Бо гэта не проста спартовыя змаганні, гэта памяць аб сапраўдным чалавеку, на якога варта раўняцца сённяшнім рабятам. Турнір стаў добрай традыцыяй, яскравым пацвярджэннем магутнай падтрымкі маладзёжных спартыўных ініцыятыў, вынікам якой становіцца гарманічнае развіццё падрастаючага пакалення.

 СБ