Старшыня Магілёўскага гарадскога Савета дэпутатаў: заклікаем сусветную супольнасць да канструктыўнага і дружалюбнага дыялогу

Мы заклікаем усю сусветную супольнасць да канструктыўнага і сяброўскага дыялогу. Пра гэта сказаў старшыня Магілёўскага гарадскога Савета дэпутатаў Максім Гурын, каментуючы зварот дэпутатаў усіх узроўняў і сенатараў да міжнароднай супольнасці ў сувязі з сітуацыяй вакол Беларусі.

«Мы падтрымалі зварот дэпутатаў і сенатараў, таму што нельга заставацца ў баку ад таго, што адбываецца. Нашы еўрапейскія суседзі, уся сусветная супольнасць у цэлым працягваюць абвастраць сітуацыю вакол Беларусі. Зараз ва ўсім свеце і без таго складаны перыяд. Усе краіны без выключэння сталі закладнікамі новага віруса і эканамічнага крызісу, які ён прынёс. Цяпер як ніколі важна аб’яднацца ў гэтай барацьбе, дапамагаць адзін аднаму і падтрымліваць адзін аднаго. А замест гэтага мы бачым закрытыя паветраныя межы, санкцыі ў дачыненні да нашых вядучых прадпрыемстваў, – сказаў Максім Гурын. – Дзеля пераадолення гэтых цяжкасцей, дзеля росквіту і развіцця не толькі Беларусі, але і ўсіх краін у цэлым мы заклікаем сусветную супольнасць да канструктыўнага і дружалюбнага дыялогу».

Па словах Максіма Гурына, ад прынятых Захадам санкцый і рашэнняў у першую чаргу пакутуюць звычайныя грамадзяне. «Беларусы па сваёй натуры вельмі міралюбныя і адкрытыя. І цяпер праз санкцыі, якія прымаюцца еўрапейскімі краінамі ў дачыненні да нашых прадпрыемстваў, праз закрыццё паветраных межаў у першую чаргу пакутуюць звычайныя людзі, – падкрэсліў дэпутат. – У Беларусі празрыстая экспартна арыентаваная эканоміка, мы вырабляем велізарную колькасць тавараў, якія карыстаюцца попытам за мяжой. Але праз санкцыі знікае магчымасць рэалізоўваць іх на звыклых рынках. Гэта напрамую ўплывае на дабрабыт і пакупніцкую здольнасць беларусаў. Праз забароны, якія дзейнічаюць у небе, людзі нават у адпачынак не могуць з’ездзіць. Дык для чаго патрэбныя былі санкцыі? Адабраць у Беларусі рынкі збыту і заняць наша месца? Пакараць звычайных людзей за іх выбар? На мой погляд, такое ўмяшальніцтва ва ўнутраныя справы нашай краіны недапушчальнае».

«Мы зрабілі свой выбар, і цяпер нас караюць за гэта. Але Беларусь – моцная краіна, якая даказвала гэта на працягу ўсёй сваёй гісторыі. Нам у спадчыну дастаўся выдатны край, у нас працавітыя і шчырыя людзі. Дзякуючы моцнай вертыкалі ўлады, развітай грамадзянскай супольнасці мы пераадолеем усе цяжкасці і ніколі не адмовімся ад свайго меркавання ва ўгоду іншым, – падкрэсліў Максім Гурын. – Усё, што мы робім сёння, якія рашэнні прымаем, непасрэдна ўплывае на будучыню. Важна заўсёды памятаць, які свет мы пакінем нашым дзецям, унукам і праўнукам».

БЕЛТА