Свята першага снапа. На Бабруйшчыне афіцыйна дадзены старт уборачнай кампаніі

Раённае свята «Зажынкі» прайшло на полі ААТ «Неўскі-Агра». Удзел у ім прынялі старшыня Бабруйскага райвыканкама Аляксандр Сухадольскі, кіраўнік дэпутацкага корпуса раёна Ірына Старавойтава, работнікі райсельгасхарча, кіраўнікі гаспадарак, прадстаўнікі прафсаюзаў і, вядома ж, лепшыя механізатары раёна, якім трэба будзе ўдарна папрацаваць падчас жніва-2024.

Па добрай традыцыі адкрылася свята песнямі, якія звычайна спявалі жнеі, выходзячы ў поле, пасля чаго слова было дадзена Аляксандру Сухадольскаму. Аддаючы даніну павагі хлебу і хлебаробам, кіраўнік раёна пажадаў працаўнікам палёў здароўя, цярпення і выказаў упэўненасць, што аграрыі збяруць дастойны ўраджай: «Перад усімі, хто заняты на жніве, стаіць важная і адказная задача - убраць ураджай своечасова, якасна і без страт, - адзначыў кіраўнік раёна. - Хай умовы надвор'я вас не палохаюць, а толькі настройваюць на дзелавы лад. Кожная пагодлівая хвілінка павінна быць скарыстана па максімуме, без прастояў збожжаўборачнай тэхнікі. Усе працы неабходна выканаць у найкароткі тэрмін, цалкам і без страт. Бо багацце роднага краю залежыць ад кожнага з нас».

Жніцы, апранутыя ў нацыянальныя касцюмы, сярпамі сціснулі каласы ў сноп новага ўраджаю, правялі старажытны беларускі абрад, паводле якога ў пачатку жніва трэба было дамовіцца з зямлёй-матушкай і падзякаваць ёй за падораны ўраджай. З пажаданнямі вялікага хлеба і добрага надвор'я ўручылі Аляксандру Сухадольскаму сноп новага ўраджаю - сімвал жыцця, аснову дабрабыту, паказчык багацця, заможнасці, гаспадарлівасці Бабруйскага раёна.

Са словамі на дарогу плённую, якасную працу, багаты ўраджай да хлебаробаў звярнуліся Ірына Старавойтава і кіраўнік ААТ «Неўскі-Агра» Міхаіл Стрыжэўскі. Прыхільнасці ад надвор'я, Божай дапамогі ў богаўгоднай справе пажадаў настаяцель храма ў гонар святога дабравернага князя Аляксандра Неўскага іерэй Віктар Палкоўнікаў. Ён блаславіў пачатак уборачнай кампаніі і асвяціў камбайны і іншую тэхніку.

Перадавым хлебаробам гаспадаркі: Валянціну Тарасевічу, Міхаілу Міхалёнку, Ільі Чэрніку і Аляксандру Шурыну былі ўручаны медыцынскія аптэчкі ад Беларускага Чырвонага Крыжа, затым механізатары занялі свае месцы ў кабінах камбайнаў і магутныя машыны адправіліся ў поле па новы ўраджай.

Святкаванне суправаджалася песнямі ў выкананні творчых калектываў раёна. А хлебная ніва, што калосіцца, караблі палёў, настроеныя на ўпартую працу механізатары — гэта ўсё добрыя складнікі будучага жніва, а «Зажынкі-2024» сталі добрым пачынам паспяховай уборачнай кампаніі.

 bobrlife.by