Таварны партфель ААТ «Белшына» папоўніцца новай шынай для кар’ерных самазвалаў

У ААТ «Белшына» пастаянна ідзе праца над укараненнем у вытворчасць новых лінеек і тыпапамераў шын, паколькі аксіёмай любой развітай вытворчасці ў сучасным свеце з’яўляецца павелічэнне асартыменту выпускаемай прадукцыі, што дазваляе павялічваць аб’ёмы продажаў.

У лютым 2021 года на ААТ «Белшына» былі выпушчаны доследныя ўзоры новай шыны Belshina Bel-785 памернасці 33.00R51. Яна прызначана для кар’ерных аўтасамазвалаў грузападымальнасцю 120–140 тон, якія эксплуатуюцца ў кар’ерах гарнаруднай прамысловасці пры тэмпературы навакольнага асяроддзя ад мінус 55 °С да плюс 50 °С. Новы сучасны малюнак пратэктара забяспечвае павышанае счапленне з дарожнай паверхняй і ўстойлівасць пратэктара пры правядзенні работ на скальнай пародзе, павышае супраціўленне парэзам і сколам. Прымяненне ў каркасе шыны металакорду павялічвае даўгавечнасць шын, забяспечвае абарону ад прабояў пры працы са скальнай пародай.

На бягучы момант на прадпрыемстве прапрацоўваюцца этапы для адпраўкі шын для эксплуатацыйных выпрабаванняў.

Рэд.