Турыстычны комплекс над Дняпром плануюць пабудаваць у Магілёве

Турыстычны комплекс на беразе Дняпра плануюць пабудаваць у Магілёве. Праект прадставіў начальнік упраўлення архітэктуры і горадабудаўніцтва Магілёўскага гарвыканкама Уладзімір Скачак.

«Будучы комплекс будзе пабудаваны ў парку Падніколле. Ён размесціцца на беразе Дняпра, а тэраса будзе размешчана прама над вадой. Будынак будзе трохпавярховым, што дазволіць размеркаваць патокі гасцей», –заўважыў Уладзімір Скачак.

Плошча будучай забудовы складзе 1555 кв. м, плошча тэрасы–1850 кв. м. На першым паверсе комплексу будзе рэстаран, тры банкетныя залы розных памераў, кухня і крытая зона разгрузкі. На другім паверсе размесцяцца гасцінічныя нумары двух класаў: стандарт і люкс. Трэці паверх будзе адміністрацыйным.

«У праект уваходзіць не толькі стварэнне самога турыстычнага комплексу, але і добраўпарадкаванне тэрыторый. Парк Падніколле зараз–адно з самых папулярных месцаў у горадзе як у магілёўцаў, так і ў нашых гасцей. З’яўленне новага і незвычайнага будынка стане адным з этапаў развіцця магілёўскага парку і зробіць яго яшчэ больш прывабным», – адзначыў Уладзімір Скачак.

На сённяшні дзень упраўленне архітэктуры і горадабудаўніцтва з інвестарам рыхтуюць неабходны пакет дакументаў для рэалізацыі праекта. Прыступіць да работ плануюць ужо сёлета.

БЕЛТА