Выгадаваць патрыётаў
Нядаўна ў Бабруйскім дзяржаўным гандлёва-эканамічным каледжы прайшла інфармацыйна-пазнавальная гутарка «Сіла Асноўнага Закона» і віктарына «Гісторыя маёй Канстытуцыі». Ініцыявалі праект актывісты пярвічнай арганізацыі РГА «Белая Русь» навучальнай установы. Лідэр пяршоўкі каледжа выкладчык замежных моў Вольга Паўлюкова расказала:
- Мэта мерапрыемства - у гульнявой форме праверыць веды рабят, пераканацца, што яны глыбока вывучылі гісторыю. І вельмі прыемным адкрыццём стала тое, што навучэнцы ведаюць не толькі свае правы, але і абавязкі, што дзеці нашы актыўныя, дапытлівыя. Прымалі ўдзел у віктарыне з задавальненнем, а не з-пад палкі. Яны разумеюць, што такія сустрэчы дапамогуць ім павысіць узровень сваёй прававой культуры і палітычнай пісьменнасці, і гэта спатрэбіцца ім у далейшым жыцці, у іх прафесійнай дзейнасці.
У віктарыне ўдзельнічалі каля 40 паўналетніх навучэнцаў, якія ў наступным годзе ўжо ўступяць у дарослае жыццё, стануць таваразнаўцамі, работнікамі гандлю. Гэтыя хлопцы дапамагалі арганізатарам праводзіць мерапрыемства, задаваць пытанні. Таксама запрасілі падлеткаў ва ўзросце 15-16 гадоў.
На большасць пытанняў удзельнікі адказвалі правільна, хаця многія заданні былі вельмі складанымі. Пасля заканчэння віктарыны навучэнцы знаходзіліся ў выдатным настроі, казалі, што цудоўна правялі час, папоўнілі свае веды. Рабяты лічаць, што падобныя мерапрыемствы вельмі патрэбныя: пашыраюць кругагляд, вучаць правільна фармуляваць свае думкі, трэніруюць памяць. Акцыя гэтая сапраўды не адзінкавая - такія віктарыны праводзяцца ў каледжы пастаянна і з кожным разам збіраюць усё больш удзельнікаў.
Пераможцы, якія лепш за ўсіх адказалі на пытанні, атрымалі падарункі: блакноты, ручкі. А самыя-самыя актыўныя ўдзельнікі віктарыны - выдатныя адзнакі па грамадазнаўстве і асновам права. І гэта яны палічылі выдатным падарункам, бо ад паспяховасці напрамую залежыць памер стыпендыі: чым вышэйшыя адзнакі, тым яна большая.
Першасная арганізацыя РГА «Белая Русь» працуе ў Бабруйскім дзяржаўным гандлёва-эканамічным каледжы з 2008 года. Вольга Паўлюкова ўзначальвае пярвічку з 2012-га. Цяпер на ўліку ў арганізацыі знаходзяцца 37 чалавек.
СБ
