У Магілёўскай вобласці актыўна вядуць догляд пасеваў

У дужанні з пустазеллямі выходных не бывае

Добрая падрыхтоўка глебы, запраўка яе арганічнымі і мінеральнымі ўгнаеннямі, насенне высокай рэпрадукцыі, сяўба ў аптымальныя тэрміны - гэта яшчэ не гарантыя высокага ўраджаю. Практычна ўсім раслінам патрэбная дадатковая мінеральная падкормка. Як і хімічная праполка ад пустазелля, хвароб і шкоднікаў. Словам, поле аддзячыць земляроба толькі пры правядзенні комплексу прац па доглядзе пасеваў. Гэтым зараз заняты ва ўсіх рэгіёнах.

Ва УКСП «Эксперыментальная база «Глуск» Глускага раёна кукуруза пасеяна на 1050 гектарах. Хімічнай праполкай гэтай культуры заняты вопытны механізатар Аляксандр Кісялевіч, які працуе ў гаспадарцы ўжо 15 гадоў. Ён з тутэйшых мясцін. Адслужыўшы ў войску, вярнуўся жыць і працаваць на малую радзіму. За дзень апрацоўвае па 80 гектараў. Праполка на ўчарашні дзень ужо выканана на 85 працэнтаў.

Механізатар Сяргей Насановіч падкормлівае кукурузу, штодзень да 100 гектараў. Ён расказвае:

- Сёння нам, механізатарам, няпроста, працы шмат. Але разумеем, што тэрміны падціскаюць, таму працуем дапазна, у тым ліку ў выходныя. Вядома, стамляемся, але заробак годны, за выходныя падвойная аплата. Скончым усё своечасова, не падвядзем.

У Горацкім раёне 2820 гектараў займае цукровыя буракі. Паводле слоў загадчыцы сектара раслінаводства райсельгасхарчу Вольгі Клопатовай, першая хімпраполка гэтай культуры завершана на ўсёй плошчы, другая — на 2,7 тысячы гектараў, трэцяя — 1,6 тысячы. Сярод тых, хто завяршыў трэцюю праполку, - ААТ «Гарэцкае» і РУП «Учгас БДСГА», у бліжэйшыя дні скончыць працу ААТ «Горацкая райаграпрамтэхніка». Актыўна вядзецца трэцяя праполка цукровых буракоў у ААТ «Маслакі», «Копцеўская Ніва» і КСУП «Аўсянка».

Бурак у рэгіёне вырошчваюць таксама ў Бялыніцкім, Быхаўскім, Дрыбінскім, Мсціслаўскім, Шклоўскім, Чавускім, Кіраўскім, Магілёўскім і Асіповіцкім раёнах. Выканана першая хімпраполка, у большасці гаспадарак завяршылі і другую, у некаторых - нават трэцюю.

Кукуруза на зерне і сілас у Магілёўскай вобласці пасеяна на 151 тысяче гектараў. На ўчарашні дзень хімпраполка гэтай культуры праведзена на 64 працэнтах палёў. У некаторых раёнах паказчык значна вышэйшы. У Краснапольскім - 97 працэнтаў, Круглянскім - 82, Чэрыкаўскім - 80, Кіраўскім - 79. Аднак ёсць і праблемы, адзначыла начальнік упраўлення інтэнсіфікацыі раслінаводства камітэта па сельскай гаспадарцы і харчаванні Магілёўскага аблвыканкама Лілія Гулінская:

- Нізкімі тэмпамі вядзецца праполка кукурузы ў Крычаўскім раёне - работы выкананы толькі на 31 працэнт, Хоцімскім - 39, Чавускім - 47.

У рэгіёне вядуць догляд і пасеваў лёну, які займае 7,3 тысячы гектараў. Завершана першая праполка, на 84 працэнты - другая.

СБ